सचिन जाधव, साम टीव्ही

वैष्णवी हगवणे प्रकरणात बावधन पोलीस आता अॅक्शन मोडमध्ये आले असून, तपासाची दिशा अधिक गंभीर होत आहे. दरम्यान, बावधन पोलिसांनी तिच्या जवळच्या मैत्रिणी आणि नातेवाईकांची चौकशी सुरू केली असून, आतापर्यंत १९ साक्षीदारांचे जबाब नोंदविण्यात आले असल्याची माहिती पोलिस सूत्रांनी दिली आहे. दरम्यान, नव्या साक्षीदारांच्या घेतलेल्या जबाबानुसार, कोणती नवी माहिती समोर येत आहे का? हे पाहणं महत्त्वाचं ठरणार आहे.

वैष्णवी हगवणे हुंडाबळी प्रकरणात तपासाची दिशा अधिक गंभीर होत चालली आहे. बावधन पोलिसांनी आता तिच्या जवळच्या मैत्रिणी आणि नातेवाईकांची चौकशी सुरू केली असून, सासरच्या मंडळींकडून झालेल्या छळाच्या घटनांवर फोकस करण्यात येत आहे. वैष्णवी हगवणे प्रकरण उघडकीस आल्यानंतर तिचे व्हॉट्सअॅप चॅट्स समोर आले होते.

व्हॉट्सअॅपमध्ये तिने आपल्या एका मैत्रिणीला सासरच्या मंडळींकडून होणाऱ्या छळाबाबत माहिती दिली होती. तसेच बऱ्याच गोष्टी तिने सांगितल्या होत्या. त्यामुळे मैत्रिणीसह नातेवाईकांचा तपास हा महत्त्वाचा होता. दरम्यान, या प्रकरणात आत्तापर्यंत १९ साक्षीदारांचे जबाब नोंदविण्यात आले आहेत, अशी माहिती पोलिस सूत्रांनी दिली आहे.

आरोपी न्यायालयीन कोठडीत

वैष्णवीचे पती शशांक, सासू लता आणि नणंद करिष्मा यांना न्यायालयीन कोठडी सुनावण्यात आली असून, तिघेही सध्या येरवडा कारागृहात आहेत. त्यांच्या जामीनासाठी अर्जाची प्रक्रिया सुरू आहे, अशी माहिती समोर आली आहे. तसेच, सासरे राजेंद्र व दीर सुशील यांची पोलीस कोठडी ३१ मेपर्यंत वाढवण्यात आली आहे. तसेच पोलिसांकडून निलेश चव्हाण याचाही शोध सुरू आहे.