मराठी भाषेचीच नाही तर मराठी माणसाचीही मुंबईतच गळचेपी होत असल्याच्या घटना वारंवार समोर येत आहेत. कधी मराठीवरुन रेल्वे टीसीचं, बुकींग क्लार्कचं मुजोर बोलणं तर कधी सोसायटीच्या अध्यक्षांचं मराठीला नाकारणे अशा घटनांनी मराठी मनांच्या तळपायाची आग मस्तकाला जात आहे.

आता मुंबईतल्याच डायमंड असोसिएशन मराठी माणसालाच सभासदत्व नाकारलं आहे. याशिवाय कार्यालयातील नोटीस बोर्डावर सगळी माहितीही गुजराती आणि इंग्रजी भाषेत आहे.याविरोधात ठाकरे गट आक्रमक झालाय. मराठी माणसांला सभासदत्व न देण्याची हिंमत होतेच कशी ? असा जाब ठाकरे गटानं विचारला आहे.

नक्की काय प्रकार आहे पाहूया...

दि मुंबई डायमंड मर्चंट असोसिएशच्या पंचरत्न गिरगाव ऑपेरा हाऊस या संघटनेचे मुंबईमध्ये 17 हजार सभासद आहेत. यामध्ये फक्त 50 ते 60 सभासद मराठी आहेत. सर्व नियमावली पूर्ण करून देखील सभासदत्व दिलं नाही. काही सभासदांचा मृत्यू झाल्यानंतर नातेवाईकांना मराठी असल्याने सभासत्व देण्यास नकार दिला आहे. 600 जणांनी सभासदासाठी अर्ज केले होते. त्यामध्ये 40 मराठी माणसांनी अर्ज केले होते. पण त्यामध्ये एकही मराठी माणसाला सभासद करून घेतले नाही. नवीन सभासद अर्ज भरण्याकरता जो नियमावली अर्ज बनवला होता तो सुद्धा इंग्लिश आणि गुजराती भाषेत होता.

डायमंड संघटनेच्या कार्यालयात सणांचा उल्लेख असलेल्या बोर्डावर केवळ शिवाजी जयंती असा उल्लेख आहे. त्यावरुनही कार्यकर्ते संतप्त झालेत. छत्रपती शिवाजी महाराज असा उल्लेख असावा अशी मागणीही कार्यकर्त्यांनी केली. या आंदोलनामुळे डायमंड संघटनेच्या मुजोरीला चाप बसणार का? याकडे सगळ्यांचं लक्ष आहे. मुंबई महापालिका निवडणुकीच्या पार्श्वभूमिवर ठाकरे गटानं मराठीचा मुद्दा आक्रमकपणे लावुन धरला आहे. त्याचा राजकीय फायदा होणार का? हे पाहणही महत्वाचं आहे.