- सिद्धेश म्हात्रे

Panvel News : पनवेल (panvel) मधील कोप्रोली गावातील कमांडर सोसायटी मधील दोन युवक रात्री उशिरा गणेश विसर्जन करताना बुडाल्याची माहिती समोर आली आहे. या घटनेमुळे कोप्रोली गावात चिंतेचे वातावरण पसरले आहे. दरम्यान पोलीस (police) आणि अग्निशमन दलातील जवानांमार्फत बुडालेल्या दोन्ही मुलांचा शोध घेण्यात येत आहे असे पाेलिसांनी नमूद केले.

राजशेखर माणिक जमादार (वय 20) आणि विक्रम दिगंबर जमादार (वय 21) अशी विसर्जना दरम्यान बुडालेल्यांची नावं आहेत. स्वतःच्या घरचे विसर्जन आटोपून दोघे कमांडर सोसायटीच्या गणपतीचे विसर्जन करण्यासाठी कोप्रोली गावातील विसर्जन घाटावर गेले होते. त्यावेळी ही दुर्दैवी घटना घडली.

दोन्ही युवक एकाच कुटुंबातील असून स्वतःची मुले डोळ्या समोर बुडताना पाहण्याचे दुर्दैव या कुटुंबियांना आले. हे युवक बुडाल्यानंतर त्यांचा शोध घेण्यात येत आहे. अद्यापही दोन्ही युवकांचा शाेध लागलेला नाही. पोलीस आणि अग्निशमन दलातील जवानांमार्फत बुडालेल्या दोन्ही मुलांचा शोध घेण्यात येत आहे असे पाेलिसांनी नमूद केले.

Edited By : Siddharth Latkar