मुंबईतील अँटॉप हिलमध्ये मोठी दुर्घटना घडली आहे. येथील विजय नगरमधील पंजा गल्लीत घराचा काही भाग कोसळून दोन महिलांचा मृत्यू झाल्याची घटना घडली आहे. ही घटना आज रात्री 9.27 च्या सुमारास घडली आहे.

येथील झोपडपट्टीत असलेल्या घराच्या दुसऱ्या आणि तिसऱ्या मजल्यावरील भिंतीचा काही भाग कोसळून ही घटना घडली आहे.

भिंतीचा भाग कोसळल्यानंतर या दोन महिला गंभीर जखमी झाल्या होत्या. त्यांना तातडीने सायन रुग्णालयात हलवण्यात आलं. मात्र रुग्णालयात पोहोचण्याआधीच दोन्ही महिलांचा मृत्यू झाला होता. शोभादेवी मौर्य ( वय ४५) आणि झाकिरूनिसा शेख ( वय ५०), असं मृत महिलांची नावे आहेत.

मिळालेल्या माहितीनुसार, हा अपघात झाल्यानंतर नागरिकांनी याची माहिती स्थानिक प्रशासनाला दिली. यानंतर घटनास्थळी अग्निशमन दल आणि पोलीस दाखल झाले.

मुंबई महापालिकेच्या एका अधिकाऱ्याने सांगितले की, ''घटनास्थळी मदत आणि बचाव कार्य वेगाने केले जात आहे. स्थानिक अग्निशमन दल, वॉर्ड स्तरावरील कर्मचारी, पोलीस आणि रुग्णवाहिका घटनास्थळी दाखल झाल्या आहेत.''