मुंबईतून एक धक्कादायक बातमी समोर येत आहे. फोटो आणि मेसेजवरून झालेल्या वादातून ट्रान्सजेंडर आणि तरूणामध्ये कडाक्याचे भांडण झाले. वाद चिघळल्याने ट्रान्सजेंडरने माहिम खाडीमध्ये उडी मारली. ट्रान्सजेंडरला वाचवण्यासाठी तरूणानंही खाडीमध्ये उडी मारली. दोघांचा अद्याप शोध लागलेला नाही. बचाव पथकाकडून शोधमोहीम सुरू असून, पुढील तपास पोलीस करीत आहेत.

वांद्रे माहीम खाडी परिसरात दुपारी सुमारे १२:३० वाजेच्या सुमारास धक्कादायक घटना घडली. कलंदर अल्ताफ खान (वय वर्ष २०) आणि ट्रान्सजेंडर (वय वर्ष २०) असे माहिम खाडीमध्ये उडी घेणाऱ्या दोन्ही व्यक्तींची नावे आहेत. दोघेही वांद्रा लालमट्टी येथील रहिवासी असल्याची माहिती आहे.

दोघांमध्ये मोबाईलवरील फोटो आणि काही मेसेजवरून वाद झाला होता. वाद विकोपाला गेला. दोघांमध्ये कडाक्याचे भांडण झाले. वाद चिघळल्याने ट्रान्सजेंडर व्यक्तीने माहिम खाडीत उडी मारली. ट्रान्सजेंडरने उडी मारली असल्याचं पाहताच कलंदर अल्ताफ खान याने तिला वाचवण्यासाठी माहिम खाडीत उडी मारली.

मात्र, दोघेही खाडीमध्ये बुडाले असल्याचा अंदाज स्थानिक नागरिकांनी वर्तवला आहे. या घटनेची माहिती मिळताच पोलिसांसह बचाव पथकाने घडनास्थळी धाव घेतली. तसेच तपास आणि शोधमोहिमेला सुरूवात केली. अद्याप दोघेही पोलीस आणि बचाव पथकाला सापडले नाहीत. सध्या पोलिसांकडून पुढील तपास सुरू आहे.