फैय्याज शेख, मोखाडा

पावसाळा संपला की नोव्हेंबर - डिसेंबर महिन्यात शालेय विद्यार्थ्यांच्या सहली, सांस्कृतिक कार्यक्रम, क्रिडा अशा स्पर्धा सुरु होतात. यासाठी शिक्षक देखील तितकीच मेहनत घेतात. मात्र काही वेळेस चुकीचे नियोजन जीवावर बेतू शकते. अशीच एक घटना मोखाडा तालुक्यातील झेडपीच्या विद्यार्थ्यांसोबत घडली आहे. शिक्षक विद्यार्थ्यांना पिकअप टेम्पो मध्ये मागे बसवून क्रीडा स्पर्धेसाठी घेऊन जात होते. यादरम्यान पिकअपचा भीषण अपघात झाला. या अपघातात अनेक विद्यार्थी जखमी झाले असून २ विद्यार्थी गंभीर जखमी आहेत.

मिळालेल्या माहितीनुसार, मोखाडा तालुक्यातील चप्पलपाडा येथील जिल्हा परिषद शाळेतील विद्यार्थ्यांची क्रीडा स्पर्धा होती. या स्पर्धेसाठी शिक्षकांनी विद्यार्थ्यांना पिकअप टेम्पो मध्ये मागे बसवून क्रीडा स्पर्धेसाठी घेऊन जाण्याचे नियोजन केले. मोखाडा तालुक्यातील सातुर्ली जवळ हा पिकअप टेम्पो येताच त्याचा अपघात झाला. धक्कादायक म्हणजे या पिकअप टेम्पोचा चालक दारू पिऊन गाडी चालवत होता. त्यामुळे गाडीचा ताबा सुटल्याने हा अपघात झाला असावा असा प्राथमिक अंदाज वर्तवण्यात आला आहे.

या अपघातात अनेक विद्यार्थी जखमी झाले आहेत. जखमींमध्ये इयत्ता चौथीत शिकणारे अरूण देविदास लाखन व कुणाल संतोष भोळे या दोन विद्यार्थ्यांना गंभीर दुखापत झाली आहे. त्यांना उपचारासाठी नाशिक येथील केळकर खासगी रूग्णालयात दाखल करण्यात आले आहे. या घटनेनंतर विद्यार्थ्यांच्या सुरक्षिततेवर प्रश्न चिन्ह उपस्थित केले जात आहे. महत्वाचे म्हणजे या विद्यार्थ्यांना शिक्षकाने एका पिक अप टेम्पो मध्ये मागे बसवून घेऊन जाणे कुठपर्यंत योग्य होते असा संतापजनक सवाल उपस्थित केला जात आहे.