Thane-Mulund News

मध्य रेल्वेच्या मुलुंड रेल्वेस्थानकातील जुना पादचारी पूल तोडण्यासाठी शनिवारी (ता. ३) रात्री ठाणे ते मुलुंडदरम्यान अप आणि डाऊन जलद मार्गावर ब्लॉक घेण्यात येणार आहे. यासाठी रात्री ११.३० ते पहाटे ४.३० वाजेपर्यंत ५ तासांचा ब्लॉक असणार आहे. त्यामुळे लोकल आणि मेल-एक्स्प्रेसच्या वाहतुकीत बदल करण्यात आले आहेत.

ब्लॉकदरम्यान रात्री ११ वाजून १८ मिनिटांनी सीएसएमटी स्थानकातून डाऊन जलद मार्गावरील खोपोली लोकल विद्याविहार ते दिवा स्थानकांदरम्यान डाऊन धिम्या मार्गावरून वळविण्यात येणार आहे. तसेच सीएसएमटी येथून रात्री ९ वाजून ५४ मिनिटांनी सुटणारी कल्याण आणि कल्याण स्थानकातून रात्री ११ वाजून ५ मिनिटांनी सुटणारी सीएसएमटी लोकलही रद्द करण्यात आली आहे.

  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

छत्रपती शिवाजी महाराज टर्मिनसहून सुटणाऱ्या चेन्नई सुपरफास्ट मेल, मडगाव एक्स्प्रेस, अमृतसर एक्स्प्रेस, बनारस महानगरी एक्स्प्रेस, दादरहून सुटणारी साईनगर शिर्डी एक्स्प्रेस, सावंतवाडी तुतारी एक्स्प्रेस या गाड्या शनिवारी रात्री विद्याविहार ते ठाणे-दिवा स्थानकांदरम्यान पाचव्या मार्गावरून वळविण्यात येणार असल्याने या गाड्या निर्धारित वेळेपेक्षा १० ते १५ मिनिटे उशिराने धावतील; तर मुंबईत येणाऱ्या भुवनेश्वर कोणार्क एक्स्प्रेस, हावडा मेल, मंगळूर एक्स्प्रेस, हुसेन सागर एक्स्प्रेस आणि गदग एक्स्प्रेस कल्याण, ठाणे ते विक्रोळी स्थानकांदरम्यान सहाव्या मार्गावरून चालवल्या जातील.