रुपाली बडवे -

मुंबई : दादर येथील शिवाजी पार्कमधील (Shivaji Park) शिवसेनाप्रमुख बाळासाहेब ठाकरे यांच्या स्मृतीस्थळावरील झाड कोसळले आहे. कोसळलेले गुलमोहराचे झाड हे बाळासाहेबांनीच (Balasaheb Thackeray) लावले होते. झाड पडल्याने स्मृतीस्थळाच्या कुंपणाचे नुकसान झाले आहे. तर झाड कोसळल्यानंतर माजी महापौर किशोरी पेडणेकर स्मृतीस्थळावर पाहणी केली आहे.

बाळासाहेब ठाकरे आणि शिवाजी पार्क यांचे नाते सर्वांना परिचित आहे. शिवसेनेच्या स्थापनेपासून बाळासाहेबांच्या सभेनी शिवाजी पार्क भरुन जायचा. याच शिवाजी पार्कच्या मैदानावरती बाळासाहेबांनी आपल्या हातांनी एक गुलमोहराचे झाड लावलं होतं. तर बाळासाहेबांच्या निधनानंतर त्यांचे स्मृतीस्थळ याच झाडाच्या जवळ उभारण्यात आले होते.

पाहा व्हिडीओ -

रविवारी रात्री मुंबईत झालेल्या पावसामुळे शिवाजी पार्कवरील बाळासाहेब ठाकरेंनी लावलेले गुलमोहराचे झाड कोसळल्याची माहिती येथे काम करणाऱ्या व्यक्तीने किशोरी पेडणेकर (Kishori Pednekar) यांना दिली. त्यानंतर पेडणेकर यांनी शिवाजी पार्क येथील स्मृतीस्थळाला भेट देत घटनेची पाहणी केली. दरम्यान, कोसळून पडलेले गुलमोहराचे झाड शिवाजी पार्कवरतीच पुनर्रोपीत करण्यात येणार आहे.

Edited By - Jagdish Patil