राज्यात वाढत्या गुन्हेगारीच्या घटनांमुळे कायदा सुव्यवस्थेवर प्रश्नचिन्ह उपस्थित होत असतानाच ठाण्यातून एक धक्कादायक प्रकार समोर आला आहे. संपत्तीच्या वादातून सावत्र भावाने आपल्या भावाची निर्घृण हत्या केली असून, काही दिवसांपूर्वी जंगलात शीर नसलेला अज्ञात मृतदेह सापडल्याप्रकरणी पोलिसांनी तपास करून आरोपीला अटक केली आहे. या घटनेने संपूर्ण ठाणे परिसरात खळबळ उडाली आहे.

फैजल मोहम्मद गौरी (वय वर्ष २९) असे मृत तरूणाचे नाव आहे. तर, अन्सारी असं आरोपीचे नाव आहे. आज तकने दिलेल्या वृत्तानुसार, २९ मे रोजी गावातील जंगल परिसरात एका अज्ञात व्यक्तीचा मृतदेह सापडला. त्यानंतर पोलिसांना याची माहिती देण्यात आली. पोलिसांनी सीसीटीव्ही फुटेज तपासले.

दरम्यान, काही दिवसांपूर्वी पोलीस ठाण्यात बेपत्ता व्यक्तीबाबत तक्रार दाखल करण्यात आली होती. सीसीटीव्ही आणि बेपत्ता व्यक्तीचे फोटो जुळल्यामुळे हे प्रकरण हळूहळू उघडकीस येत होतं.

तपास पथकाने घटनास्थळावरील एका अज्ञात व्यक्तीची कार ओळखली, त्यानंतर आरोपीचा तपास करून त्याला अटक केली. आरोपी टिटवाळ्याच्या मांडा येथील रहिवासी असून, त्याने मृत व्यक्तीचा सावत्र भाऊ असल्याची कबुली दिली. दोन्ही भावांमध्ये संपत्तीवरून वाद सुरू होता. या वादातूनच आरोपीने फैजलची हत्या केली. या प्रकरणानंतर परिसरात खळबळ उडाली असून, पुढील तपास पोलिसांकडून सुरू आहे.