ठाण्यामध्ये हिट अँड रनची धक्कादायक घटना घडली आहे. ठाण्यातील नौपाडा पोलिस ठाण्याच्या हद्दीत येणाऱ्या नितीन जंक्शन परिसरात भरधाव मर्सिडीज कारने तरूणाला जोरदार धडक दिली. या अपघातामध्ये २१ वर्षीय तरुणाचा मृत्यू झाला. या अपघाताचा तपास नौपाडा पोलिस करत आहेत.

मिळालेल्या माहितीनुसार, नौपाड्याच्या नितीन जंक्शनजवळ मध्यरात्री पावणे दोनच्या सुमारास हा अपघात झाला. भरधाव मर्सिडीज कारने ठाण्यातील ज्ञानेश्वरनगर या ठिकाणी राहणाऱ्या तरुणाला जोरदार धडक दिली. या अपघातामध्ये तरुणाचा मृत्यू झाला. दर्शन हेगडे (२१ वर्षे) असं या मृत तरुणाचे नाव आहे. घटनेची माहिती मिळताच पोलिसांनी घटनास्थळी धाव घेतली. जखमी झालेल्या तरुणाला रुग्णालयात दाखल केले पण डॉक्टरांनी त्याला मृत घोषीत केले.

दर्शन हेगडे दुचाकीवरून टी. एम. सी सर्कलवरून वागळे इस्टेटकडे जात होता. त्याचवेळी भरधाव आलेल्या मर्सिडीज कारने त्याच्या दुचाकीला जोरदार धडक दिली. वाहतुकीचे नियम तोडून कारने दर्शन हेगडेच्या दुचाकीला समोरून जोरदार धडक दिली. या अपघातामध्ये दर्शनच्या डोक्याला, हात आणि पायाला गंभीर दुखापत झाली. अपघातानंतर कार चालक घटनास्थळावरून पळून गेला.

या अपघातामध्ये दुचाकीचे मोठे नुकसान झाले. त्यासोबत कारच्या पुढील भागाचे नुकसान झाले. अपघातानंतर कारचालकाने घटनास्थळावरून पळ काढला. त्याने जखमी दर्शनला रुग्णालयात देखील नेले नाही. या प्रकरणी नौपाडा पोलिस ठाण्यात अपघाताची नोंद करत कार चालकाविरोधात गु्न्हा दाखल करण्यात आला आहे. पोलिस कार चालकाचा शोध घेत आहेत.