ठाणे :- शहरातील गावदेवी मार्केटला गुरुवारी पहाटे लागलेल्या भीषण आगीत मृत्युमुखी पडलेला एक अग्निशमन दलाचा (Fire Brigade) जवान आणि एका सुरक्षारक्षकाचा कुटुंबियांना प्रत्येकी 10 लाख रुपयांची मदत जाहीर करण्यात आली आहे. तर अग्निशमन दलाच्या दोन जखमी जवानांना प्रत्येकी 1 लाख रुपयांची मदत देण्यात येईल असे उपमुख्यमंत्री एकनाथ शिंदे (DCM Eknath Shinde) यांनी जाहीर केले. गुरुवारी संध्याकाळी त्यांनी गावदेवी मार्केटला भेट देऊन पाहणी केली. यानंतर माध्यमांशी बोलताना त्यांनी ही घोषणा केली.

यावेळी त्यांनी गावदेवी मार्केटमध्ये (Gaondevi Market) झालेली आगीची घटना ही अत्यंत दुर्दैवी असून या आगीत दोन जणांना आपला जीव गमवावा लागला आहे. या घटनेत मृत्युमुखी पडलेल्या दोन्ही जवानांना मी श्रद्धांजली अर्पण करतो असे शिंदे यांनी यावेळी बोलताना सांगितले. तसेच झालेल्या घटनेची गंभीर दखल घेऊन या मार्केटचे आणि ठाण्यातील इतरही मार्केटचे तातडीने इलेक्ट्रिक ऑडिट आणि स्ट्रक्चरल ऑडिट करण्याचे निर्देश दिले असल्याचे त्यांनी सांगितले. तसेच या घटनेत मृत्युमुखी पडलेल्या जवानांना विम्याचे १२ लाख रुपये तातडीने देण्यासोबतच ठाणे मनपा कडून (TMC) प्रत्येकी १० लाख रुपये देण्यात येतील असेही त्यांनी जाहीर केले.

या आगीत व्यापाऱ्यांचे आणि गाळे धारकांचे मोठे नुकसान झाले आहे. मध्यरात्री आग लागल्याने त्यांना सामानही बाहेर काढता आले नाही. त्यामुळे मार्केट हे संपूर्णपणे आगीत जाळून गेले आहे. ठाणे मनपा आयुक्तांना हे मार्केट तातडीने स्वच्छ करून त्यात इलेक्ट्रिकचे काम पूर्ण करून येत्या १० दिवसात व्यापाऱ्यांना पुन्हा व्यवसायासाठी हे गाळे हस्तांतरित करावेत असेही निर्देश दिले असल्याचे शिंदे यांनी यावेळी बोलताना स्पष्ट केले.

कळवा रुग्णालयात जाऊन जखमींची विचारपूस

यानंतर उपमुख्यमंत्री एकनाथ शिंदे यांनी कळवा येथील छत्रपती शिवाजी महाराज रुग्णालयात (Hospital) जाऊन या घटनेत जखमी झालेल्या अग्निशमन दलाच्या दोन जवानांच्या तब्येतीची विचारपूस केली. यावेळी त्यांनी डॉक्टरांकडून त्यांच्यावर सुरू असलेल्या उपचारांचीही माहिती घेतली. यावेळी त्यांनी त्यांना विश्रांती घेण्यास सांगितले. तसेच गरज लागल्यास त्यांना खाजगी रुग्णालयात दाखल करण्यात यावे असेही स्पष्ट निर्देश दिले.