मुंबई : मुंबईतील दहिसर पश्चिम परिसरात एक धक्कादायक घटना घडलीये. येथील स्टेट बँक ऑफ इंडियामध्ये (State Bank Of India) दरोडा टाकण्याच्या उद्देशाने गोळीबार करण्यात आला आहे. गुरुकुल बिल्डिंग जीएस रोडवर ही स्टेट बँकेची शाखा आहे. ही घटना अत्यंत धक्कादायक असून ग्राहकांच्या सुरक्षेची जबाबदारी कोण घेणार? याला राज्य सरकार जबाबदार आहे, असं म्हणत विधानपरिषदेचे विरोधीपक्ष नेते प्रवीण यांनी सरकारवर टिकास्त्र सोडलं आहे.

प्रवीण दरेकर नेमकं काय म्हणाले?

"अत्यंत धक्कादायक अशी घटना घडलेली आहे. कालच मी कायदा सुवस्थेवर अंतिम आठवडा प्रस्ताव आणला होता. आज हा दरोडा टाकला गेला. अशा प्रकारे बॅंक लुटण्यासाठी गोळीबार होत असेल तर कसे जगायचे. ग्राहकांच्या सुरक्षेची जबाबदारी कोण घेणार? याला राज्य सरकार जबाबदार आहे. गुन्हेगाराचा धीर चेपला तर अराजकता माजेल. मी त्याठिकाणच्या डिसीपी यांच्यासोबत बोललो. त्यांना चौकशी करण्यास सांगितलं आहे", असं प्रवीण दरेकर (Pravin Darekar) म्हणाले.

हेही वाचा -

नेमकं काय घडलं?

मुंबईतील दहिसर पश्चिम परिसरातील गुरुकुल बिल्डिंग जीएस रोडवर असलेल्या स्टेट बँक ऑफ इंडियामध्ये (State Bank Of India) दरोडा टाकण्याच्या उद्देशाने गोळीबार करण्यात आला. घटनेची माहिती मिळताच एमएचबी पोलिसांचे पथक, डीसीपी विशाल ठाकूर यांच्यासह अतिरिक्त पोलिस आयुक्त प्रवीण पडवळ घटनास्थळी पोहोचले आणि प्रकरणाचा तपास करत आहेत.

ही घटना बुधवारी दुपारी चार वाजण्याच्या सुमारास घडली असून, या दरोड्यात आरोपी किती रक्कम घेऊन फरार झाले आहेत, याचा तपास पोलीस करत आहेत. बँकेच्या आत झालेल्या गोळीबारात एक व्यक्ती जखमी झाला आहे. त्याला उपचारासाठी जवळच्या रुग्णालयात नेण्यात आले आहे. सध्या पोलीस या संपूर्ण प्रकरणाचा तपास करत आहेत.

Edited By - Nupur Uppal