पुणे : आई रागावते म्हणून मुलाने आईचा खून केल्याचा धक्कादायक प्रकार पुण्यात समोर आला आहे. पुण्यातील लोणी काळभोर पोलिस ठाण्याच्या हद्दीत उरळी कांचन भागात ही घटना घडली आहे आहे. पोलिसांनी आरोपी मुलाला ताब्यात घेतलं असून पुढील तपास करत आहेत.

अभ्यास करताना सारखा मोबाईल पाहतो या कारणावरुन आई मुलाला रागावत असत. या क्षुल्लक कारणावरुन मुलाने आईचा खून केला आहे. तस्लिम शेख (३७) असे मृत आईचे नाव असून तिचा मुलगा जिशन शेख (१८) यानेच हत्या केली असल्याचे पोलिस तपासात उघड झाले आहे. (Pune News)

पोलिसांनी दिलेल्या माहितीनुसार, तस्लिम शेख या त्यांच्या पती आणि मुलासह उरळी कांचन भागात राहत होत्या. सुरुवातीला तस्लिम यांनी आत्महत्या केली अशी माहिती पोलिसांना मिळाली होती. मात्र शवविच्छेदन झाल्यानंतर ही आत्महत्या नसून हत्या आहे, असे निष्पन्न झाले. पोलिसांनी घरातील व्यक्तींची चौकशी केली असता जिशनने घडलेला सगळा प्रकार सांगितला.

बारावीला असलेला जिशन हा अभ्यास करत असताना मोबाईल पाहतो म्हणून त्याच्या आईने त्याला रागावले होते आणि मारलंही होतं. यामुळे चिडलेल्या जिशनने त्याच्या आईला भिंतीवर ढकलले आणि तिचा गळा दाबून खून केला.

घाबरलेल्या जिशनने त्याच्यावर संशय येऊ नये म्हणून आईच्या हाताची नस कापली. मात्र रक्त न आल्याने त्याने मृतदेहाला पंख्याला लटकवले आणि तिने आत्महत्या केली असा बनाव केला. पोलिसांनी त्याला ताब्यात घेतले असून पुढील तपास सुरू आहे.