राज्यातील सहकारी साखर कारखाने हे ग्रामीण भागातील अर्थकारणाचे केंद्र आहेत. त्यामुळे प्रत्येक गाळप हंगामात कोणता कारखाना उसाला किती दर देणार, याकडे ऊस उत्पादक शेतकऱ्यांचे लक्ष लागलेले असते. अशातच बारामती तालुक्यातील सोमेश्वर सहकारी साखर कारखान्यानं 2025-26 गाळप हंगामासाठी अनुदानासह टनाला 4 हजारांचा उच्चांकी ऊसदर जाहीर केलाय.

'सोमेश्वर'कडून उसाला विक्रमी दर

सध्याचा FRP दर - 3,285

दिलेला दर -4000

वाढीव दर - 725

दिवंगत नेते अजितदादा यांच्या कडक शिस्तीमुळे राज्यातील सर्वोच्च दर देऊ शकलो. त्यांच्या स्मृतींना हा निर्णय अर्पण अशी भावना कारखान्याच्या अध्यक्षांनी व्यक्त केली आहे. दुसरीकडे उच्चांकी दर जाहीर झाल्याने शेतकऱ्यांनी आनंद व्यक्त केला आहे. मार्चमध्ये तुटलेल्या उसाला चार हजार रुपये भाव दिला आहे. मात्र त्याची संख्या नगण्य आहे. याकडे लक्ष वेधत शेतकरी नेते राजू शेट्टींनी या निर्णयाचे स्वागत केले आहे.

२०२५-२६ हंगामात सोमेश्वर कारखान्याने सुमारे १३ लाख मेट्रीक टन ऊसाचे गाळप केले आहे. तसेच वीज निर्मिती, इथेनॉल आणि अल्कोहोलचंही मोठं उत्पादन घेतले आहे. अनेक साखर कारखान्यांना घरघर लागली असताना सोमेश्वरची किमया इतर कारखान्यांना पण साधली जाणार का ? हे पाहणं महत्वाचं आहे.