Baramati News : पुणे जिल्ह्यातील बारामती तालुक्यातील सोमेश्वर सहकारी साखर कारखाने सन 2022 - 23 या हंगामात गाळप केलेल्या उसाला उपमुख्यमंत्री अजित पवार (Ajit Pawar) यांच्या मार्गदर्शनाखाली प्रति टन 3350 रुपये दर जाहीर केला आहे. संपूर्ण राज्यात एफआरपी पेक्षा प्रतिटन पाचशे रुपये ज्यादा दर देणारा सोमेश्वर साखर कारखाना हा राज्यातील पहिला कारखाना ठरला आहे.

सोमेश्वर सहकारी साखर कारखान्याची संचालक मंडळाची नुकतीच बैठक झाली. या बैठकीत ऊसाला प्रति टन 3350 रुपये देण्याचा निर्णय घेण्यात आल्याची माहिती कारखान्याचे अध्यक्ष पुरुषोत्तम जगताप यांनी दिली. (Maharashtra News)

जेष्ठ नेते शरद पवार, उपमुख्यमंत्री अजित पवार ,खासदार सुप्रिया सुळे यांच्याकडून सातत्याने कारखानाला मार्गदर्शनास सहकार्य लाभते. तसेच ऊस उत्पादक, सभासद ,अधिकारी कामगार आणि ऊस तोडणी वाहतूकदार कामगारांच्या सहकार्यातून ही घोडदोड अशीच कायम राखण्याचा प्रयत्न करू अशी ग्वाही जगताप यांनी दिली.

सोमेश्वर कारखान्याने गेल्या वर्षी तुटून गेलेल्या उसाला २ हजार ८४६ रुपये एफआरपी दिली होती. यामध्ये संचालक मंडळाने टनाला ५४ रुपयांची अधिकची भर टाकून सभासदांना २ हजार ९०० रुपये अदा केले होते. त्यामुळे सोमेश्वर कारखान्याच्या सभासदांना अजून टनाला ४५० रुपये मिळणार आहेत.

Edited By : Siddharth Latkar