मुंबई : भारतीय जनता पार्टीचे (BJP) नेते श्रीकांत देशमुख यांना मुंबई उच्च न्यायालयाने मोठा दिलासा दिलाय. श्रीकांत देशमुख यांच्या अटकपूर्व जामीन अर्जावर मुंबई उच्च न्यायालयात आज सुनावणी झाली. या सुनावणीत न्यायालयाने श्रीकांत देशमुख (Shrikant Deshmukh) यांचा अंतरिम जामीन मंजूर केला आहे. न्यायमूर्ती अनुजा प्रभुदेसाई यांनी हा जामीन अर्ज मंजूर केला. (Shrikant Deshmukh Todays News)

'तक्रारदार महिला आणि अर्जदार श्रीकांत देशमुख यांच २००८ पासूनचे नातेसंबंध आणि जुनी मैत्री होती. त्याचबरोबर अर्जदार हे विवाहित होते, याची जाणीव तक्रारदार महिलेस पहिल्या दिवसापासून होती. तरी आपसातील प्रेम संबंध परस्पर संमतीने होते, आजवर होत आले. त्यामुळे अर्जदार यांना अंतरिम दिलासा देणे उचित आहे', असे मत नोंदवून न्यायालयाने श्रीकांत देशमुख यांना मोठा दिलासा दिला.

काय आहे प्रकरण?

भारतीय जनता पार्टीचे सोलापूरमधील नेते श्रीकांत देशमुख यांचा एक व्हिडीओ काही दिवसापूर्वी सोशल मीडियावर व्हायरल झाला होता. या व्हिडिओत एका महिलेनं श्रीकांत देशमुख यांच्यावर गंभीर आरोप केले होते. व्हिडिओ व्हायरल होताच, श्रीकांत देशमुख यांच्यावर गुन्हा दाखल करण्यात यावा अशी मागणी विरोधकांकडून करण्यात आली. (Shrikant Deshmukh News Today)

याप्रकरणी पोलिसांनी तक्रारदार महिलेल्या फिर्यादीवरून श्रीकांत देशमुख यांच्यावर गुन्हा दाखल केला होता. इतकंच नाही तर, त्यांना अटक करण्याचे आदेशही देण्यात आले होते. या विरोधात श्रीकांत देशमुख यांनी न्यायालयात जामिनासाठी अर्ज केला होता. आज या जामीन अर्जावर मुंबई उच्च न्यायालयात सुनावणी झाली. न्यायालयाने त्यांचा जामीन अर्ज मंजूर केला.

Edited By - Satish Daud