अभिजीत देशमुख

Viral Video : शाळेच्या वर्गात साप आढळून आल्याने विद्यार्थी शिक्षकांची चांगलीच तारांबळ उडाल्याची घटना आज कल्याणमध्ये घडली. साप शाळेत शिरल्याची माहिती सर्पमित्रांना मिळतात सर्पमित्रांनी घटनास्थळी धाव घेत सापाला पकडलं. त्यानंतर शिक्षकांसह विद्यार्थ्यांनी देखील सुटकेचा निश्वास सोडला.

कल्याण पश्चिमेतील शशांक विद्यालयात आज दुपारी बारा वाजण्याच्या सुमारास शाळा सुरू झाली. विद्यार्थी वर्गात बसले असताना एका बेंचखाली साप असल्याचे निदर्शनास आले. त्यामुळे शिक्षक आणि विद्यार्थ्यांची एकच तारांबळ उडाली. शिक्षकांनी तत्काळ विद्यार्थ्यांना वर्गाबाहेर काढले. (Viral Video)

पुस्तके आणि बॅग सोडूनच विद्यार्थ्यांनी शिक्षकांसह वर्गाबाहेर धाव घेतली. याबाबत सर्पमित्रांना माहिती देण्यात आली सर्पमित्र दत्ता बोम्बे यांनी घटनास्थळी धाव घेत बेंचखाली लपलेल्या सापाला पकडलं. यानंतर विद्यार्थ्यांसह शिक्षकांचा जीवातजीव आला. हा साप बिनविषारी धामण जातीचा असून त्याला नैसर्गिक अधिवासात सोडले जाणार असल्याचे बोंबे यांनी सांगितले.