पुण्यातील हिंजवडीतून एक धक्कादायक बातमी समोर येत आहे. हिंजवडी परिसरात सुरू असलेल्या रस्ते रुंदीकरणाच्या पार्श्वभूमीवर पोलिसांकडून बळाचा वापर केल्याचा आरोप स्थानिक ग्रामस्थांनी केलाय. याच संदर्भात एक धक्कादायक व्हिडीओ समोर आला असून, यात वरिष्ठ पोलिस अधिकारी एका नागरिकाला शिवीगाळ करत धक्काबुक्की करताना दिसत आहे. हा व्हिडिओ सध्या सोशल मीडियात व्हायरल होत आहे.

स्थानिकांनी दिलेल्या माहितीनुसार, कोणतीही पूर्वसूचना किंवा नोटीस न देता बांधकाम पाडण्यासाठी अधिकारी आणि कर्मचारी गावात आले होते. याचा जाब विचारणाऱ्या नागरिकाला, हिंजवडी पोलीस स्टेशनचे वरिष्ठ पोलीस निरीक्षक बालाजी पांढरे यांनी अर्वाच्य भाषेत शिवीगाळ केली. तसेच धक्के मारत अटक करण्याची धमकी दिली. संबंधित व्हिडीओ सध्या समाजमाध्यमांवर व्हायरल होत आहे.

या सगळ्या प्रकारावर आणखी एक धक्कादायक बाब म्हणजे, सत्ताधारी राष्ट्रवादी काँग्रेसचे आमदार शंकर मांडेकर घटनास्थळी उपस्थित असूनही त्यांनी पोलिसांच्या या दडपशाहीविरोधात कोणतीही भूमिका घेतलेली नाही. त्यामुळे ग्रामस्थांमध्ये तीव्र नाराजी व्यक्त होत आहे. हा प्रकार समोर आल्यानंतर हिंजवडीत पोलिस प्रशासनविरुद्ध रोष वाढण्याची शक्यता वर्तवली जात आहे.