संजय गडदे, साम टीव्ही प्रतिनिधी

Mumbai kidnapping case : मुंबईच्या मालवणीत कॉल सेंटर कर्मचाऱ्याचे अपहरण करून 6 लाखांहून अधिक रुपयांची खंडणी घेतल्याच्या आरोपाखाली मालवणी पोलिसांनी मुंबई पोलीस अधिकार्‍याच्या नातेवाईकासह दोघांना अटक केली आहे. आरोपीने पीडित तरुणाचा न्यूड व्हिडिओ बनवून सोशल मीडियावर टाकण्याची धमकीही दिली. अँजल गोम्स (25) आणि आदित्य बडेकर (21) अशी अटक करण्यात आलेल्यांची नावे आहेत. फिर्यादीने मालवणी पोलीस ठाण्यात तक्रार दिल्यानंतर मालवणी पोलिसांनी दोघांनाही अटक करून न्यायालयात हजर केले.कोर्टाकडून दोघांनाही पोलीस कोठडी सुनावण्यात आली. मालवणी पोलीस अधिक तपास करत आहेत.

पोलिसांनी सांगितले की, २४ डिसेंबर रोजी पहाटे ३ वाजता मालाड पश्चिम मालवणी, लगून रोड, महाकाली परिसरातून २५ वर्षीय तरुणाचे अपहरण केले. अपहरणकर्त्या त्या तरुणाला गोरेगाव येथील एका बांधकामाधीन इमारतीत घेऊन गेले, जिथे गांजाची पिशवी धरून नग्न अवस्थेत त्याचे चित्रीकरण केले. त्यानंतर आरोपीने दुसऱ्या दिवशी संध्याकाळी त्या तरुणाला सोडून दिले आणि घटनेबाबत कोणाला सांगितल्यास व्हिडिओ व्हायरल करण्याची धमकी दिली. जाण्यापूर्वी त्याने पीडित तरुणाच्या खात्यातून 6 लाखांहून अधिक रुपये ट्रान्सफर केले.

अपहरण झालेला तरुण आणि गोम्स हे दोघेही एकाच कॉल सेंटर मध्ये काम करत होते. मात्र एप्रिल महिन्यात गोम्स ची नोकरी गेली त्यामुळे गोम्सला वाटले की त्याच्यामुळे आपली नोकरी गेली. त्यामुळे त्याने आपल्या एका मित्रासह योजना बनवून त्या तरुणाच्या अपहरणाचा गुन्हा घडवून आणला.

बडेकरने आपल्याला घराबाहेर पकडून ठेवल्याचेही पीडित तरुणाने सांगितले. थोड्याच वेळात गोम्स तेथे आला आणि त्या तरुणाला मारहाण करून गोरेगावच्या एका निर्माण आधीन इमारतीत नेऊन हातात गांजाची पिशवी देऊन नग्न व्हिडिओ चित्रीकरण केले. यानंतर दोघांनीही तक्रारदाराला एटीएम मध्ये नेऊन त्याच्या खात्यातून पैसे काढून घेतले. यासंदर्भात फिर्यादीने मालवणी पोलीस ठाण्यात तक्रार दिल्यानंतर मालवणी पोलिसांनी दोघांनाही अटक करून न्यायालयात हजर केले असता दोघांनाही पोलीस कोठडी सुनावण्यात आली. मालवणी पोलीस अधिक तपास करत आहेत.