पराग ढोबळे, साम टीव्ही

राज्यात गेल्या काही महिन्यांपासून धावत्या वाहनांना आग लागण्याच्या घटनेत वाढ होऊ लागली आहे. नागपूर उमरेड मार्गावरही एका धावत्या खासगी बसला आग लागल्याची घटना घडली आहे. नागपुरातील IT कॉलेज ते उकळवाही हेटीदरम्यान ही घटना घडली. बसला आग लागल्याने प्रवाशांमध्ये एकच खळबळ उडाली.

बसमध्ये एकूण ४५ प्रवासी होते. बसला आग लागल्याची माहिती मिळताच सर्वांची धावाधाव झाली. सर्व जण तातडीने एकाच वेळी बसमधून बाहेर पडल्याने जीवितहानी टळली.

धावत्या बसला शॉर्ट सर्किट झाल्यामुळे आग लागल्याचा प्राथमिक अंदाज व्यक्त केला जात आहे. आग लागल्याचं कळताच चालकाने तातडीने बस थांबवत आणि प्रवाशांना बाहेर काढले. आग लागल्यानंतर काही क्षणात संपूर्ण बसने पेट घेतला.

स्थानिक नागरिक आणि वाहनचालकांनी मदत करून आगीवर नियंत्रण मिळवले. मात्र बसचा मोठा भाग जळून खाक झाला. पोलिस आणि अग्निशमन दलाच्या पथकाने घटनास्थळी धाव घेतली. त्यामुळे आग विझविण्यात यश आलं.

अपघातामुळे रस्त्यावर काही काळ वाहतूक कोंडी निर्माण झाली होती. प्रवाशांमध्ये काहीजण किरकोळ जखमी झाले. घटनेचा अधिक तपास कुही पोलीस तपास करत आहेत. धावत्या वाहनांना आग लागण्याच्या घटना वाढू लागल्याने प्रवाशांच्या सुरक्षेचा प्रश्न ऐरणीवर आला आहे.

पुण्यात पहाटे अपघाताचा थरार

पुण्यात पहाटे भीषण अपघाताची घटना घडली. पुण्यातील येरवडा परिसरातील पेट्रोल पंपाजवळ वाहनाचा अपघात झाला. रविवारी पहाटे तीन वाजण्याच्या सुमारास हा अपघात घडला. अपघातात नेमके किती जणं जखमी झाले आहेत हे समजू शकलेले नाही. एका भरधाव वेगात येणाऱ्या वाहनाचा हा अपघात झाल्याचे समजत आहे.