अभिजीत देशमुख, साम टीव्ही

कल्याणमधून मारहाणीचा धक्कादायक व्हिडिओ समोर आला आहे. कल्याणमध्ये रिक्षा चालकांमध्ये फ्री स्टाईल हाणामारी झाल्याची घटना घडली आहे. कल्याणमधील छत्रपती शिवाजी महाराज चौकात ही घटना घडली आहे. दोन्ही रिक्षा चालकांनी एकमेकांना बेदम मारहाण केली. या मारहाणीत एक रिक्षाचालक जखमी झाला आहे. तर दुसऱ्याला थेट फिटच आली. या दोघांच्या हाणामारीचा व्हिडिओ सोशल मीडियावर व्हायरल होत आहे.

कल्याणमध्ये रिक्षा चालकांची मुजोरी कायम बघायला मिळते. कल्याणमधील काही रिक्षाचालक प्रवाशांवर दादागिरी करताना दिसतात. मागील वर्षभरात रिक्षा चालकांनी प्रवाशांना मारहाण केल्याच्या अनेक घटना घडल्या आहेत. मारहाणीच्या अनेक तक्रारी पोलिसांत नोंद आहेत. कल्याणमधील याच रिक्षाचालकांच्या बेशिस्तीचा आणखी एक व्हिडिओ सोशल मीडियावर व्हायरल झाला आहे.

व्हिडिओमध्ये काय दिसत आहे?

कल्याणच्या छत्रपती शिवाजी महाराज चौकात रिक्षाचालकांमध्ये राडा झाला. दोन रिक्षाचालक एकमेकांना भिडले. दोन्ही रिक्षाचालकांमधील वादाचे रुपांतर तुंबळ हाणामारीमध्ये झालं. एका रिक्षाचालकाच्या नातेवाईकांनी दुसऱ्या रिक्षाचालकाला मारहाण केली. या मारहाणीत रिक्षाचालक जखमी झाला. या हाणामारीवेळी एकाला फिट आली.

फिट आल्यानंतर हा तरुण थेट रस्त्यावर कोसळला. त्यानंतर त्याच्या मदतीला काही लोक धावले. या प्रकरणी पोलिसांत तक्रार नोंदवण्यात आल्याची कोणतीही माहिती अद्याप समोर आलेली नाही. मात्र, रिक्षाचालकांच्या हाणामारीचा व्हिडिओ सोशल मीडियावर व्हायरल होत आहे. त्यामुळे रिक्षाचालकांच्या बेशिस्तीच्या आणखी एक प्रकार समोर आला आहे.