Mumbai News : महाराष्ट्रात सुरू असलेल्या राजकीय उलथापालथीच्या पार्श्वभूमीवर राष्ट्रवादी काँग्रेसच्या कार्याध्यक्षा सुप्रिया सुळे यांच्या मागणीवर कारवाई करत अध्यक्ष  शरद पवार यांनी सुनील तटकरे आणि प्रफुल्ल पटेल यांची पक्षातून हकालपट्टी केली आहे. या कारवाईवर प्रफुल्ल पटेल यांनी उत्तर दिलं आहे.

शरद पवार यांचा निर्णय आम्हाला लागू नाही. कारण मोठ्या प्रमाणात पक्षातील लोकांचा आम्हाला पाठिंबा आहे. मात्र यातून कोणताही वाद व्हावा अशी आमची इच्छा नाही. पक्ष कुणाचा आणि पक्षाचे अधिकार कुणाकडे याचा निर्णय घेण्याचा अधिकार निवडणूक आयोगाला आहे, असं प्रफुल्ल पटेल यांनी म्हटलं.

आमच्याकडे आमदार नसते तर काल शपथ झाली नसती. आमची शरद पवारांना हात जोडून विनंती आहे की त्यांनी पक्षाचे नेते आणि कार्यकर्ते यांची इच्छा मान्य करावी, असं आवाहनही प्रफुल्ल पटेल यांनी केलं. (Latest Marathi News)

काय म्हणाले होते शरद पवार?

शरद पवार यांनी ट्वीट करत म्हटलं की, मी राष्ट्रीय अध्यक्ष या नात्याने, राष्ट्रवादी काँग्रेस पक्षतून सुनील तटकरे आणि प्रफुल्ल पटेल यांना पक्षविरोधी कारवाई केल्याप्रकरणी त्यांना पक्षातून काढून टाकण्याचे आदेश देत आहे.

सुनील तटकरे नवे प्रदेशाध्यक्ष

जयंत पाटील यांना राष्ट्रवादीच्या प्रदेशाध्यक्षपदावरून हटवल्याची घोषणा देखील यावेळी करण्यात आली आहे. तसेच सुनील तटकरे यांची प्रदेशाध्यक्षपदी नियुक्ती केली आहे. याबाबत पक्षाचे कार्यकारी अध्यक्ष प्रफुल्ल पटेल यांनी घोषणा केली आहे.