Opposition Meeting Venue : बिहारमधील पाटणा येथे विरोधी पक्षांच्या नेत्यांची पहिली बैठक झाल्यानंतर दुसरी बैठक शिमला येथे होणार असल्याचे सांगण्यात येत होते. मात्र, विरोधी पक्षांची दुसरी बैठक ही बेंगळुरूत होणार आहे, अशी माहिती राष्ट्रवादी काँग्रेसचे सर्वेसर्वा शरद पवार यांनी आज, गुरुवारी दिली. ही बैठक १३ आणि १४ जुलै रोजी होईल.

केंद्रातील भाजप ( BJP News ) सरकारविरोधात देशातील जवळपास १५ विरोधी पक्ष एकवटले होते. बिहारमधील पाटणा येथे विरोधी पक्षांच्या नेत्यांची पहिली बैठक झाली होती. या बैठकीत सर्व पक्षांच्या नेत्यांची एकजूट दिसून आली. (Marathi Tajya Batmya)

शरद पवार यांनी केली घोषणा

विरोधी पक्षांच्या नेत्यांची (Opposition Meeting Update) पुढील बैठक ही १३ आणि १४ जुलैला बेंगळुरूत होईल, असे शरद पवार यांनी जाहीर केले. या पत्रकार परिषदेत शरद पवार (Sharad Pawar) यांनी मोदींवरही निशाणा साधला. पाटणा येथील विरोधी पक्षांच्या बैठकीनंतर पंतप्रधान मोदी हे अस्वस्थ झाले आहेत, असंही पवार म्हणाले.

विरोधी पक्षांच्या बैठकीला ३२ नेत्यांची उपस्थिती

पाटणा येथे बिहारचे मुख्यमंत्री नितीश कुमार यांच्या नेतृत्वात विरोधी पक्षांची बैठक झाली होती. या बैठकीला विविध पक्षांचे जवळपास ३२ नेते सहभागी झाले होते. मायावती, नवीन पटनाइक, के चंद्रशेखर राव, वाय. एस. जगनमोहन रेड्डी यांना निमंत्रित करण्यात आले नव्हते. तर आरजेडीचे नेते जयंत चौधरी हे पूर्वनियोजित कौटुंबिक कार्यक्रमामुळे उपस्थित राहू शकले नव्हते.