Summary -

• आमदार दौलत दरोडा यांच्या पुतण्याचा तुरुंगात मृत्यू

• भात खरेदी घोटाळा प्रकरणात दोन महिन्यांपूर्वी अटक

• आधारवाडी कारागृहात ठेवण्यात आले होते

फैय्याज शेख, शहापूर

शहापूरमधील राष्ट्रवादी अजित पवार गटाचे आमदार दौलत दरोडा यांच्या पुतण्याचा तुरूंगात मृत्यू झाला. दौलत दरोडा यांचा पुतण्या हरीश दरोडाचा हृदयविकाराच्या झटक्याने मृत्यू झाला. आदिवासी विकास महामंडळाच्या भात खरेदी घोटाळा प्रकरणात त्याला अटक करण्यात आली होती. तुरूंगात असताना त्याला हृदयविकाराचा झटका आला. त्यांना तात्काळ ठाण्यातील जिल्हा शासकीय रुग्णालयात दाखल करण्यात आले. पण उपचार सुरू असताना त्यांचा मृत्यू झाला.

मिळालेल्या माहितीनुसार, शहापूरचे राष्ट्रवादीचे आमदार दौलत दरोडा यांचा पुतण्या हरीश दरोडाचे हृदयविकाराच्या झटक्याने निधन झाले. हरीश दरोडाने आदिवासी महामंडळाच्या भात खरेदीमध्ये मोठा घोटाळा केल्याचा आरोप होता. या प्रकरणात चौकशीदरम्यान दोन महिन्यापूर्वी ठाणे गुन्हे शाखेच्या पोलिसाकडून त्याला अटक करण्यात आली होती. त्यामुळे त्याला कल्याणमधील आधारवाडी कारागृहात ठेवण्यात आले होते.

कारागृहात असताना त्याची तब्येत अचानक बिघडल्याने उपचारासाठी त्याला ठाणे येथील शासकीय रुग्णालयात दाखल करण्यात आले होते. मात्र रात्री उपचारादरम्यान त्याला हृदयविकाराचा तीव्र झटका आला आणि त्याचे निधन झाले. या घटनेमुळे शहापूरमध्ये एकच खळबळ उडाली आहे. दरम्यान, शहापूर तालुक्यातील साकडबाव केंद्रातील तब्बल पाच हजार क्विंटल भाताची अफरातफर केल्याप्रकरणी हरीश दरोडा याच्यावर किन्हवली पोलिस ठाण्यात डिसेंबर २०२३ ला गुन्हा दाखल करण्यात आला होता. काही दिवसांपूर्वी वाजतगाजत अजित पवार गटात हरीश दरोडाचा पक्षप्रवेश सोहळा पार पडला होता. त्यानंतर घोटाळा प्रकरणात त्याला पोलिसांनी अटक केली होती.

ठाणे जिल्ह्यात गेल्या दोन ते तीन वर्षांत सुमारे १६ कोटींचा भात खरेदी घोटाळा उघडकीस आला आहे. या भात खरेदीचा शहापूर तालुक्यातील साकडबाव केंद्रात देखील दीड कोटींचा भात खरेदी घोटाळा उघडकीस आला होता. आमदार दौलत दरोडा यांचा पुतण्या आणि साकडबाव आदिवासी विविध कार्यकारी सहकारी संस्थेचे अध्यक्ष हरीश दरोडा याच्यासह ४ जणांनी शेतकऱ्यांच्या खोट्या आणि बोगस चलन पावत्या बनवून शासनाची आणि आदिवासी विकास महामंडळाची सुमारे दीड कोटींची फसवणूक केली होती.