- अभिजीत देशमुख

Kalyan-Dombivli Municipal Corporation News : कल्याण डोंबिवली महापालिकेत समाविष्ट करण्यात आलेल्या 27 गावांमध्ये मालमत्ता करात दहापटीने वाढ केल्याचा आरोप सर्वपक्षीय हक्क संरक्षण समितीने केला. हा कर रद्द करून 2015 च्या कर आकारणीनुसार करण्यात यावा अशी मागणी समितीने केली आहे. (Maharashtra News)

गेल्या अनेक वर्षांपासून याबाबत पाठपुरावा करून देखील महापालिकेने कर वाढ कमी न केल्याने ग्रामस्थांनी आक्रमक पवित्रा घेतला आहे. सर्वपक्षीय हक्क संरक्षण संघर्ष समितीच्या वतीने 20 एप्रिलला महापालिका मुख्यालयावर धडक मोर्चा काढत धरणे आंदोलन करणार असल्याचा इशारा दिला आहे.

या आंदोलनात मालमत्ता कर कमी करण्याच्या मागणीसह 27 गावांची स्वतंत्र नगरपालिका करणे ,ग्रोथ सेंटर रद्द करणे ,भाल ,भोपर गावातील डम्पिंग ग्राउंड रद्द करणे, भूमिपुत्रांनी स्वतःच्या गरजेपोटी केलेली सर्व बांधकामे नियमित करणे, आरोग्य व शिक्षण व्यवस्था सदृढ करणे अशा मागण्या मांडणार असल्याची माहिती चंद्रकांत पाटील (सचिव सर्व पक्षीय हक्क संरक्षण संघर्ष समिती) यांनी दिली.

Edited By : Siddharth Latkar