मुंबई: उपमुख्यमंत्री देवेंद्र फडणवीस (Devendra Fadnavis) यांनी आज मनसे अध्यक्ष राज ठाकरे यांची भेट घेतली. राज ठाकरे यांच्या तब्येतीची चौकशी करण्यासाठी ही भेट घेतल्याचे बोलले जात आहे, पण या भेटीमागे आगामी होणाऱ्या मुंबई महापालिका निवडणुकी (Election) संदर्भात चर्चा झाल्याचे बोलले जात आहे. तर काही दिवसांपासून मनसे आणि भाजप हिंदुत्वाच्या मुद्द्यावरुन एकत्र येणार असल्याचे बोलले जात आहे.

शिवसेनेतून एकनाथ शिंदे (Eknath Shinde) यांनी ४० आमदारांसह बंड केले आहे. सध्या राज्यात शिंदे-फडणवीस सरकार स्थापन झाले आहे. देवेंद्र फडणवीस यांनी उपमुख्यमंत्री पदाची शपथ घेतल्यानंतर राज ठाकरे यांनी फडणवीस यांचे पत्र लिहून अभिनंदन केले होते. या पत्रावरुन फडणवीस आणि ठाकरे यांची जवळीक वाढली असल्याचे बोलले जात आहे.

शिंदे-फडणवीस सरकारच्या मंत्रिमंडळाचा विस्तार काही दिवसांनी होणार आहे. त्याअगोदर राज ठाकरेंची ही भेट महत्वाची मानली जात आहे. या मंत्रिमंडळात मनसेला मंत्रिपद मिळणार असल्याची चर्चा राजकीय वर्तुळात सुरू होती. राज ठाकरे यांचे पुत्र अमित ठाकरे यांना मंत्रिपद दिले जाऊ शकते, अशी चर्चा राजकीय वर्तुळात सुरू आहे. अमित ठाकरे यांनी मंत्रिपद स्वीकारले तर त्यांना विधानसभा किंवा विधान परिषदेचे सदस्य व्हावे लागेल. मात्र, यापूर्वी राज ठाकरे (Raj Thackeray) यांनी हे वृत्त फेटाळून लावले आहे.

या अगोदरही देवेंद्र फडणवीस यांनी राज ठाकरेंचे कौतुक केले आहे. राज्याच्या उपमुख्यमंत्रिपदाची शपथ घेतल्याबद्दल राज ठाकरेंनी देवेंद्र फडणवीस यांचेही अभिनंदन केले आहे. राज ठाकरे यांनी शिंदे-फडणवीस सरकारला पाठिंबा दिला आहे.

हे देखील पाहा

मुंबई महानगरपालिकेची निवडणूक काही दिवसांनी होणार आहेत. या निवडणुकीत मनसे आणि भाजप एकत्र येऊ शकतात असं बोलले जाज आहे. मनसे अध्यक्ष राज ठाकरे यांनी महाविकास आघाडी सरकार काळात भोंग्यांविरोधात राज्यभरात मोठे आंदोलन सुरू केले होते.