पुणेकरांनो पाणी वाया घालवत असाल तर थांबा. कारण येत्या काही दिवसांत पाणीपुरवठा बंद ठेवण्यात येणार आहे. त्यामुळे आवश्यक तेवढे पाण्याचा साठा करून ठेवावा असे आवाहन करण्यात आले आहे. शहरातील विविध जलकेंद्रांमध्ये विद्युत पंपिंगची तातडीची देखभाल-दुरुस्तीची कामे हाती घेण्यात येणार आहेत. या पार्श्वभूमीवर १० सप्टेंबर रोजी पुण्यातील अनेक भागांचा पाणीपुरवठा बंद राहणार आहे. बुधवार रात्री १२ वाजल्यापासून गुरुवारी रात्री १२ वाजेपर्यंत संबंधित भागांमध्ये पाणीपुरवठा बंद ठेवण्यात येणार असल्याची माहिती महापालिका प्रशासनाने दिली आहे.

१२ तास पाणीपुरवठा राहणार बंद

या कामांचा परिणाम जुने पर्वती जलशुद्धीकरण केंद्र, स्टेज-२ पर्वती एच.एल.आर. झोन, भामा आसखेड बँकवेल, वारजे जलकेंद्र तसेच त्याअंतर्गत येणाऱ्या विविध पाणीपुरवठा क्षेत्रांवर होणार आहे. पर्वती एच.एल.आर. टाकी परिसरातील सहकारनगर, पद्मावती, बिबवेवाडी, मुकुंदनगरचा काही भाग, महर्षीनगर, गंगाधाम, चिंतामणीनगर, इंदिरानगर, पर्वती गावठाण, प्रेमनगर, भाग्योदयनगर, शिवनेरीनगर, मिलानगर, कोंढवा खुर्द आदी भागांचा पाणीपुरवठा प्रभावित होणार आहे.

'या' भागांना पाणीपुरवठा बंदचा फटका

भामा आसखेड योजनेअंतर्गत लोहगाव, कळस-धानोरी, टिंगरेनगर, विमाननगर, वडगावशेरी, कल्याणीनगर, येरवडा, खराडी तसेच लगतच्या परिसरातील पाणीपुरवठ्यावर परिणाम होणार आहे. त्याचप्रमाणे गोखलेनगर, औंध, बोपोडी, पुणे विद्यापीठ परिसर, लॉ कॉलेज रोड, सेनापती बापट रोड, भांडारकर रोड, प्रभात रोड, पौड रोड, कोथरूड, कर्वेनगर, मयूर कॉलनी आदी भागांनाही पाणीपुरवठा बंदचा फटका बसणार आहे.

पाणी पुरवठा कधी होणार सुरळीत?

चांदणी चौक टाकी परिसरातील बावधन, पाषाण, सुतारवाडी, सोमेश्वरवाडी, सुस रोड, भुसारी कॉलनी आदी भाग, तर गांधी भवन टाकी परिसरातील वारजे-माळवाडी, कोथरूड, हिंगणे, कर्वेनगर आणि आसपासच्या भागांचा समावेश आहे. पॅनकार्ड क्लब जीएसआर परिसरातील बाणेर, बालेवाडी आणि पॅनकार्ड रोड परिसरातही पाणीपुरवठा बंद राहणार आहे. याशिवाय जुने-नवे होळकर जलकेंद्र, कोंढवे-धावडे आणि वडगाव जलकेंद्रांतर्गत येणाऱ्या विविध भागांवरही परिणाम होणार आहे. कात्रज, धनकवडी, येवलेवाडी, आंबेगाव, सुखसागरनगर, सिंहगड रोड, धायरी, वडगाव आदी परिसरातही पाणीपुरवठा प्रभावित होण्याची शक्यता आहे. दरम्यान, शुक्रवार, ११ सप्टेंबर रोजी सकाळी उशिरा तसेच कमी दाबाने पाणीपुरवठा होण्याची शक्यता प्रशासनाने व्यक्त केली आहे. त्यामुळे नागरिकांनी पाण्याचा आवश्यक साठा करून ठेवावा आणि पाणीपुरवठा विभागाला सहकार्य करावे, असे आवाहन करण्यात आले आहे.