सचिन जाधव

Pune News:

पुण्यात दोन ट्रक एकमेकांवर धडकून भीषण अपघात झाला आहे. भरधाव ट्रक समोरील ट्रकवर पाठीमागून आदळल्यामुळे झालेल्या अपघातात ट्रकचालकासह दोघेजण गंभीर जखमी झालेत.

घटनेबाबत मिळालेल्या माहितीनुसार, कात्रज बायपास रस्त्यावर नवले पुलाखाली मंगळवारी पहाटे साडेचार वाजण्याच्या सुमारास हा अपघात झालाय. या अपघातात ट्रकमध्ये अडकलेल्या चालक आणि क्लीनरची अग्निशामक दलाच्या जवानांनी सुखरूप सुटका केलीये.

नेमकं काय घडलं?

आज पहाटे कात्रजहून वारजेच्या दिशेने दोन मालवाहू ट्रक निघाले होते. नवले पुलाखाली आल्यानंतर समोरील ट्रकचालकाने अचानक ब्रेक मारला. त्यामुळे पाठीमागून येणारा भरधाव ट्रक समोरच्या ट्रकवर जोरात आदळला.

या अपघातात मागच्या ट्रकमधील चालक आणि क्लीनर दोघे जखमी झाले. ट्रकची पुढील बाजू चेपल्याने ट्रकचालक स्टेअरिंग आणि सीटच्यामध्ये अडकून पडला होता. केबिनचा दरवाजा उघडत नसल्यामुळे दोघांनाही बाहेर पडता येत नव्हते.

याबाबत अग्निशामक दलाला माहिती मिळताच सिंहगड रस्ता, नवले पूल अग्निशामक केंद्राचे जवान दोन बंब आणि पीएमआरडीएच्या रेस्क्यू व्हॅनसह घटनास्थळी दाखल झाले. त्यानंतर त्यांना बाहेर काढून हॉस्पिटलमध्ये उपचारासाठी भरती केलंय.