सागर आव्हाड, पुणे प्रतिनिधी
Pune Satara highway accident kills two students : पुणे-सातारा महामार्गावर झालेल्या अपघातात १७ वर्षांच्या २ विद्यार्थ्यांचा मृत्यू झाल आहे. या प्रकरणी राजगड पोलिसांत गुन्हा दाखल झाला आहे. नसरापूरहून येत असताना एका वाहनाने विद्यार्थ्यांच्या दुचाकाली मागून जोरात धडक दिली. हा अपघात इतका भीषण होता की दुचाकीचा चेंदामेंदा झाला. तुषार शिंदे आणि अर्थव पाटील या दोन मित्रांचा या अपघातात जागीच मृत्यू झाला.
भोर तालुक्यातील सारोळा येथे पुणे-सातारा महामार्गावर झालेल्या भीषण अपघातात दोन मित्रांचा मृत्यू झाला. या प्रकरणी अपघात घडवून घटनास्थळावरून पसार झालेल्या अज्ञात वाहनचालकाविरुद्ध राजगड पोलीस ठाण्यात गुन्हा दाखल केला असून पुढील तपास सुरू आहे. अपघातानंतर महामार्गावर वाहतूककोंडी झाली होती. पोलिसांनी अपघातग्रस्त दुचाकी बाजूला करून वाहतूक सुरळीत केली.
मिळालेल्या माहितीनुसार, रविवारी सायंकाळी सुमारे ५.१५ वाजण्याच्या सुमारास सारोळा गावच्या हद्दीतील पुणे-सातारा महामार्गावरील हॉटेल नवलाई समोर हा अपघात झाला. तुषार दादासाहेब शिंदे (वय १७, रा. नायगाव, ता. खंडाळा) आणि त्याचा मित्र अथर्व विजय पाटील (वय १७, रा. शिरवळ, ता. खंडाळा) हे दुचाकीवरून नसरापूरहून शिरवळच्या दिशेने जात होते. यावेळी मागून भरधाव वेगाने आलेल्या अज्ञात वाहनाने त्यांच्या दुचाकीला जोरदार धडक दिली. या भीषण अपघातात तुषार शिंदे याचा जागीच मृत्यू झाला, तर गंभीर जखमी झालेल्या अथर्व पाटील याचा उपचारादरम्यान मृत्यू झाला.
अपघातानंतर संबंधित वाहनचालकाने जखमींना मदत न करता घटनास्थळावरून पलायन केल्याचे फिर्यादीत नमूद करण्यात आले आहे. तुषार शिंदे यांचे मामा राजेंद्र गोविंद नेवसे यांनी दिलेल्या फिर्यादीवरून राजगड पोलीस ठाण्यात अज्ञात वाहनावरील अज्ञात चालकाविरुद्ध गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक राठोड करीत आहेत. अपघात घडवून पसार झालेल्या वाहनाचा शोध घेण्यासाठी पोलिसांनी परिसरातील सीसीटीव्ही फुटेज आणि अन्य तांत्रिक पुराव्यांची तपासणी सुरू केली आहे.
दरम्यान, कॉलेजमध्ये प्रवेश घेऊन परतत असताना घडलेल्या या दुर्दैवी अपघातामुळे नायगाव, शिरवळ आणि परिसरात शोककळा पसरली आहे. अवघ्या १७ वर्षांच्या दोन विद्यार्थ्यांचा झालेला मृत्यू सर्वत्र हळहळ व्यक्त करणारा ठरला असून त्यांच्या कुटुंबीयांवर दुःखाचा डोंगर कोसळला आहे. फरार वाहनचालकाचा शोध घेण्याचे आव्हान पोलिसांसमोर असून त्यासाठी तपासाची चक्रे वेगाने फिरू लागली आहेत
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.