सचिन जाधव

Pune News : राज्यातील अनेक भागांमध्ये पावसाची स्थिती चिंताजनक आहे. अनेक ठिकाणी पावसाचं प्रमाण कमी असल्याने नागरिकांची चिंता वाढली आहे. पुणे शहरातही यंदा कमी पावसाची नोंद झाली आहे.

पुणे शहरामध्ये यंदा जून महिन्यात ८३.९ मिमी पावसाची नोंद झाली आहे. गेल्या दहा वर्षांमधील या महिन्यातील हा तिसरा सर्वात कमी पाऊस नोंदवला गेला आहे.

२०१४ मध्ये केवळ १३.८ मिमी पाऊस पडला होता, तर २०२२ मध्ये ३५ मिमीची नोंद झाली होती. जुलै महिन्यातील १५ दिवस संपले असून, आतापर्यंत केवळ ४० मिमीची नोंद झाली असून ही गेल्या १० वर्षांमधील सर्वात कमी पावसाची नोंद ठरली आहे.

त्यामुळे पुणेकरांच्या चिंतेमध्ये वाढ होणार आहे. भारतीय हवामानशास्त्र विभागाने यंदा पाऊस कमी असल्याचे जाहीर केले आहे. जूनमध्ये मान्सून उशिरा दाखल झाला. त्यानंतर जूनमध्ये पावसाला जोर नव्हता. जुलै महिन्यात तरी चांगला पाऊस होईल, अशी अपेक्षा व्यक्त केली जात होती. परंतु अर्धा महिना संपला तरी जोरदार पावसाची प्रतीक्षाच आहे. (Latest Marathi News)

गेल्या वर्षीदेखील जून महिन्यात केवळ ३५ मिमी पाऊस झाला होता. तर जुलैमध्ये मात्र पूरस्थिती आली होती. तेव्हा ३८६ मिमी पावसाची नोंद झाली होती. यंदाही कदाचित जुलै महिन्याच्या अखेरीस जोरदार पाऊस होण्याची शक्यता आहे.हवामान खात्यानेही तसा अंदाज दिला आहे.