नितीन पाटणकर, पुणे

पुणे पोर्शे कार अपघात प्रकरणात (Pune Porsche Car Accident) मोठी अपडेट समोर आली आहे. या अपघात प्रकरणातील आरोपी मुलाच्या रक्ताच्या रिपोर्टमध्ये फेरफार करण्यासाठी ३ लाख रुपयांची देवाण-घेवाण झाली होती. आता ही पैशांची देवाण-घेवाण कुणे केली आणि कुठे झाली याबाबतची माहिती उघड झाली आहे. मुंबईतून अटक करण्यात आलेल्या अश्फाक मकानदारने ससून रुग्णालयातील (Sassoon Hospital) शिपायी अतुल घटकांबळे याला ३ लाख रुपये दिले होते. ही पैशांची देवाण-घेवाण बाल न्याय मंडळाच्या आवारात झाली असल्याची धक्कादायक माहिती समोर आली आहे.

मिळालेल्या माहितीनुसार, अतुल घटकांबलेला अश्फाक मकानदारनेच ३ लाख रुपये बाल न्याय मंडळाच्या आवारात दिले होते. पुणे पोलिसांनी सीसीटीव्ही जप्त केले आहेत. या सीसीटीव्हीमध्ये संपूर्ण घटना चित्रित झाल्याची माहिती समोर आली आहे. १९ मे रोजी बाल न्याय मंडळात या प्रकरणाची सुनावणी सुरू असतानाच पैशांची आर्थिक देवाण-घेवाण झाल्याची धक्कादायक माहिती समोर आली आहे.

ससून रुग्णालयातील शिपाई अतुल घटकांबळेला अश्फाक मकानदारने येरवडा येथील बाल न्याय मंडळाच्या आवारात ३ लाख रुपये दिल्याची माहिती उघडकीस आली आहे. डॉ. अजय तावरे आणि डॉ. श्रीहरी हाळनोर यांच्या सांगण्यावरून अतुल घटकांबळेने हे पैसे स्वीकारले होते. याबाबतचे सीसीटीव्ही पोलिसांना मिळाले आहे. याप्रकरणात दिवसेंदिवस नवीन माहिती उघड होत आहे.

मुलाला १९ मे रोजी येरवड्यातील बाल न्याय मंडळाच्या आवारात हजर करण्यात आले होते. त्याच ठिकाणी अतुल घटकांबळेने अश्फाक मकानदार याच्याकडून ३ लाख रुपये घेतले होते. अश्फाक मकानदार दुचाकीवरून त्याठिकाणी आला होता. दुचाकीच्या डिक्कीत त्याने ही रक्कम ठेवली होती. ही घटना सीसीटीव्ही कॅमेऱ्यांनी कैद केली आहे. पोलिसांनी हे सीसीटीव्ही फुटेज जप्त केले आहे. त्यानुसारच पुढील तपास करत आहेत.