राज्यात नगरपरिषद आणि नगरपंचायत निवडणुकांसाठी मतदान प्रक्रिया पार पडली. उर्वरित जागांसाठी २० डिसेंबर रोजी निवडणूक पार पडेल. सध्या अनेक भागात महानगरपालिका निवडणुकांसाठी नेत्यांकडून जय्यत तयारी सुरू आहे. अनेकांना महापालिकेचे वेध लागले आहे. अशातच पुण्यातील राजकीय वर्तुळात मोठी घडामोड घडली आहे. पुण्यात शिवसेना पक्षप्रमुख उद्धव ठाकरेंच्या शिवसेनेकडून मोठं पाऊल उचलण्यात आलं आहे. शहरातील सर्व जागांवर त्यांनी उमेदवारी अर्ज भरण्यास सुरूवात केली आहे.

एकाबाजूला उद्धव ठाकरेंची शिवसेना मनसेला घेऊन महापालिका निवडणूक लढवणार अशी चर्चा सुरू आहे. अशातच शिवसेना उद्धव ठाकरे गटाकडून पुण्यात मोठं उचलण्यात आलं आहे. आगामी पुणे महानगरपालिका निवडणुकीसाठी शिवसेना उबाठा सर्व ४१ प्रभागात उमेदवाराचे अर्ज घेणार असल्याची माहिती आज शहर प्रमुख संजय मोरे यांनी दिली. त्यांनी एकंदरीत एकला चलो रेचा नारा दिला असल्याची चर्चा आहे.

आघाडी किंवा युती न झाल्यास शिवसेना पुणे शहरातील सर्व ४१ प्रभागातील १६५ जागा लढणार असल्याची माहिती आज शिवसेना ठाकरे गटाने पत्रकार परिषदेतून दिली. पक्षाकडून उमेदवारी अर्जाची किंमत पाचशे रुपये ठेवण्यात आली आहे. तर, उमेदवारी अर्ज दाखल करताना दहा हजार रुपये शुल्क ठेवण्यात आलं आहे. यावेळी उमेदवारांचे शिक्षण त्यांचे सामाजिक आणि शैक्षणिक कार्य, पक्षाच्या आंदोलनातील सहभाग आणि जनसंपर्क याबाबत विचारणा केली जाईल.

दरम्यान, पुण्यात मनसेसोबत युती आणि महाविकास आघाडीसाठी कोणतेही हालचाल होत नसल्याने शिवसेनेची एकट्याने लढण्याची तयारी सुरू केल्याची चर्चा आहे. शिवसेना ठाकरे गटाने घेतलेल्या निर्णयानंतर पुण्यातील राजकीय वर्तुळात खळबळ उडाली आहे.