Pune Viman Nagar News : पुणेकरांचा प्रवास सुरक्षित आणि अधिक सुरळीतपणे सुरु राहावा यासाठी पुणे शहरातील विमाननगर वाहतूक विभागाच्या अंतर्गत वाहतुकीत तात्पुरत्या स्वरुपाचे बदल करण्याबाबत आदेश जारी करण्यात आले आहेत. या प्रकरणी वाहतूक विभागाने जनतेला सहकार्य करण्याचे आवाहन केले आहे.

वाहतुकीत काय अपडेट आहे?

- फिनिक्स मॉल (विमाननगर चौक, जंक्शन) ते सोमनाथ नगर चौक या दरम्यान गोलाकार पद्धतीने वाहतुकीत बदल करण्यासाठी विमाननगर चौक, जंक्शन हे प्रायोगिक तत्त्वावर तात्पुरत्या स्वरुपात बंद करण्यात आले आहेत.

- विमाननगरहून पुण्याकडे जाणाऱ्या वाहनांनी विमाननगर चौकातून डावीकडे वळन घेऊन सोमनाथ नगर चौक येथून यू टर्न घेवून इच्छितस्थळी जावे.

- नगरहून पुण्याकडे येणाऱ्या व विमाननगर फिनिक्स मॉलकडे जाणाऱ्या वाहनांनी अग्निबाज गेट समोरुन यू टर्न घेऊन इच्छितस्थळी जावे.

या आदेशाबाबत काही सूचना किंवा हरकती असल्यास नागरिकांनी १५ फेब्रुवारी २०२५ पर्यंत पोलीस उपआयुक्तांच्या कार्यालयात लेखी स्वरुपात कळवाव्यात. नागरिकांच्या सूचनांवर अभ्यास आणि विचार करुन अत्यावश्यक सेवेतील वाहने वगळून वाहतूक बदलांबाबत अंतिम आदेश लागू केले जातील अशी माहिती पोलीस उपआयुक्त अमोल झेंडे यांनी दिली आहे.

मेट्रो मार्गिकांनाही मिळाली मंजूरी

पुणे शहरात हडपसर, लोणीकाळभोर या मेट्रो मार्गिकांसाठी मंजूरी देण्यात आली आहे. आज विधानभवनातील झुंबर हॉलमध्ये उपमुख्यमंत्री अजित पवार यांच्या उपस्थितीमध्ये महाराष्ट्र मेट्रो रेल कॉर्पोरेशनची बैठक पार पडली. या बैठकीत शहरातील दोन मेट्रो मार्गिकांना मंजूरी मिळाली. यामुळे पुणेकरांचा प्रवास सुखद आणि जलद होणार आहे.