अक्षय बडवे, पुणे

पुण्यामध्ये यावर्षी तुफान पाऊस पडला. या मुसळधार पावसामुळे पुण्यामध्ये अक्षरश: सगळीकडे पाणी पाणी झाले होते. महत्वाचे म्हणजे नालेसफाई नसल्यामुळे, नद्यांमध्ये मोठ्याप्रमाणात गाळ आणि कचरा अडकल्यामुळे पुणे शहरामध्ये पाणी शिरले होते. नदीला आलेल्या पूरामुळे अनेक पुणेकरांच्या घरामध्ये पूराचे पाणी शिरले होते. यामुळे मोठ्याप्रमाणात नुकसान झाले. यापुढे पुणेकरांना टेन्शन घेण्याचे कारण नाही. कारण आता पुण्यामध्ये नाल्यांची सफाई 'स्पायडर मशिन'ने केली जाणार आहे.

पुणे शहरातील नाले अरुंद आहेत. तेथे अन्य मशिनरी पोहचू शकत नाहीत आणि मनुष्यबळाचाही वापर करू शकत नसल्याने स्पायडर मशिनने नाले स्वच्छ केले जाणार आहेत. ३ कोटी ५३ लाख ४२ हजार रुपयांच्या पाच निविदांना स्थायी समितीच्या बैठकीत मान्यता देण्यात आली आहे. नाल्यांमध्ये अवघड ठिकाणी जेसीबी, पोकलेन पोहचू शकत नसल्याने तेथे स्वच्छता करता येत नाही. त्यामुळे अत्याधुनिक स्पायडर मशिन वापरून नाले साफ केले जाणार आहे.

पुणे शहरातून सुमारे ३५० किलोमीटर लांबीचे नाले वाहतात. त्यामध्ये कचरा, राडारोडा टाकला जात असल्याने प्रवाहाला अडथळा निर्माण होतो. नाल्याला पूर आल्यानंतर शेजारी वस्ती, सोसायट्यांमध्ये पाणी घुसल्याने मोठे नुकसान होते. महापालिकेच्या मलनिःसारण विभागाने नाल्यांची स्पायडर मशिनने स्वच्छता करून घेण्यासाठी परिमंडळ निहाय निविदा काढली आहे. नाल्यांची खोली जास्त असल्याने आणि आरोग्याचा प्रश्‍न निर्माण होण्याच्या शक्यतेने मनुष्यबळ लावून काम करता येत नाही. त्यामुळे स्पायडर मशिन लावून हा भाग स्वच्छ केला जाणार आहे.