भरत मोहळकर, साम टीव्ही

पुण्यातील तरुणांकडून रिल्ससाठी जीवघेणा स्टंट केल्याचा एक व्हिडीओ समोर आलाय. एका उंच इमारतीवर चढून हा स्टंट केलाय. स्नायूंच्या शक्तीची चाचणी म्हणजेच मसल स्ट्रेंग्थ टेस्ट करण्यासाठी या तरुणीने हा स्टंट केला. रिल्ससाठी स्टंटबाज तरूण-तरुणींवरहा हा रिपोर्ट आहे.

मरणाला खुलं आव्हान देणाऱ्या या व्हिडीओतील ही तरुणी पाहा कसा जीवघेणा स्टंट करतेय. हा सिन कुठल्या सिनेमातला नाही. तर पुण्यातील स्वामी नारायण मंदिराजवळच्या एका मोडकळीस आलेल्या इमारतीवरील आहे. पुन्हा पहा या तरुणीचा जीवघेणा स्टंट. हात सुटला तर थेट कपाळमोक्षच. मात्र कुठलाही विचार न करता ही तरुणी बिनधास्तपणे हा स्टंट करतीय आणि सोबत आणलेले कॅमेरामन हा स्टंट कॅमेऱ्यात टिपत आहे.

व्हिडीओत दिसत आहे रील्समध्ये तरुण टेरेसवर झोपलाय. त्याने उजवा हात टेरेसवरून खाली सोडलाय. त्या हाताला तरुणी लटकत आहे आणि चहुबाजूंनी हे सगळं कॅमेऱ्यात टिपलं जातंय. मात्र त्या तरुणाला वजन पेललं नसतं किंवा तरुणीचा हात निसटला असता तर थेट तिला जीवालाच मुकावं लागलं असतं. सुदैवाने तरुणीचा जीव वाचलाय. मात्र सोशल मीडियावर रील्स व्हायरल झाल्याने या जीवघेण्या स्टंटवर जोरदार टीका केली जातेय.

माझं तरुणांना आवाहन आहे की केवळ या डिजिटल माध्यमांमध्ये प्रसिद्धीसाठी अशा पद्धतीने आपला जीव धोक्यात येईल अशाप्रकारचे कोणतेही काम करू नये. प्रशासनाने यावर कारवाई केली पाहिजे, असे मत राष्ट्रवादी काँग्रेस शरद पवार गटाचे खासदार अमोल कोल्हे यांनी व्यक्त केले आहे.

पुण्यातील हा जीवघेणा स्टंट मसल स्ट्रेंथ या प्रकारचा असल्याचं म्हटलं जातंय. मसल बळकट आहेत की नाही याची टेस्ट करण्याच्या अनेक सुरक्षित जागा आहेत. त्यासाठी जीवघेणी उंचावर जाण्याची गरजच काय? चारच दिवसांपूर्वी अशाच पद्धतीने हात सोडून दुचाकी चालवण्याचा जीवघेणा स्टंट केल्याचा व्हिडीओ व्हायरल झाला होता. तर संभाजीनगरमध्ये रील्स बनवताना कार दरीत कोसळून तरुणीचा मृत्यू झाला होता. अशा अनेक घटना वारंवार समोर येतात. पोलिसही अशा प्रकारे जीवघेणे स्टंट न करण्याचं आवाहन करतात. मात्र रील्सचं हे फॅड काही कमी व्हायला तयार नाही.