पुणे : पुण्यात  कोयता गँगची दहशत पाहायला मिळत आहे. गेल्या काही दिवसांमध्ये कोयदा गँगने दहशत माजवण्याच्या अनेक घटना समोर आल्या आहेत. या घटनांचे अनेक व्हिडीओ देखील समोर आले आहेत. मात्र आता या कोयता गँगचा बंदोबस्त करण्यासाठी पोलीस यंत्रणा सज्ज झाली आहे.

कोयता गँग तसेच कोयता घेऊन दहशत निर्माण करण्यारांविरोधत एक नवीन पथक तयार करण्यात येणार आहे. राज्याचे पोलिस महासंचालक रजनीश शेठ यांनी याबाबत घोषणा केली आहे.  (Latest Marathi News)

कोयता गँगची दहशत पुण्यासाठी मोठी डोकेदुखी बनली आहे. त्यावर नियंत्रण मिळवण्यासाठी पुण्याचे पोलिस आयुक्त यांनी दखल घेतली आहे. कोयता गँग विरोधात एक नवीन पथक तयार करण्यात येणार. हे गुन्हे कसे कमी होतील यासाठी प्रयत्नशील आहोत, असं रजनीश शेठ यांनी म्हटलं आहे.

कोयता गँगवर कारवाई करण्यासाठी पोलीस प्रशानस सर्वोतोपरी प्रयत्न करत आहे. पुणे पोलिसांनी थेट कोयता विक्री करणाऱ्या दुकानावर छापेमारी केली. या कारवाईत पोलिसांनी जवळपास 105 कोयते जप्त केले होते.

अजित पवारांनी विधानसभेत कारवाईची मागणी

कोयता गँगचा मुद्दा विरोधी पक्षनेते अजित पवार यांनी हिवाळी अधिवेशनात देखील उपस्थित केला होता. नागरिकांमध्ये कोयता गँगची दहशत आहे. या गँगवर मकोका लावावा, आरोपींना तडीपार करावे. कोयता गँगची दहशत मोडून काढण्यासाठी कठोर कारवाई करा, अशी मागणी अजित पवार यांनी हिवाळी अधिवेशनात केली होती.