ज्ञानेश्वर हिंगोलीकर -

पुणे: मागील अनेक दिवसांपासून नोएडामधील 'ट्विन टॉवर'ची (Twin Towers) चर्चा सुरू होती. हा टॉवर अवघ्या काही क्षणात होत्याचा नव्हता झाला. ब्लास्टमुळे तो सेकंदात जमीनदोस्त झाला आणि ३०० कोटी रुपयांच्या त्या भल्यामोठ्या वास्तूचा धुरळा झाला. या टॉवर पडलेले क्षण खूप व्हायरल झाले होते. मात्र, आता अशा कंट्रोल ब्लास्टिंगचा अनुभव पुणेकरांना येण्याची शक्यता आहे.

कारण बहुचर्चित आणि सततच्या वाहतूक कोंडीसाठी प्रसिद्ध असणारा पुण्यातील चांदणी चौकातील (Chandni Chowk) पूल देखील आता दहा सेकंदात पाडणार असल्याची माहिती समोर येत आहे. नोएडातील ट्वीन टॉवर पाडलेली संस्था चांदणी चौकातील पूल पाडणार असून यासाठी पूल आणि परिसराची माहिती घेण्यासाठी नोएडाहून एक पथक पुण्यात (Pune) दाखल होणार असल्याचंही समजतं आहे.

पाहा व्हिडीओ -

तसंच हा पूल पाडण्यासाठी कंट्रोल ब्लास्टिंग पद्धतीचा वापर होणार आहे. त्यामुळे ट्विन टॉवर प्रमाणे हा पूल देखील १० सेकंदात जमिनदोस्त होणार आहे. मागील काही दिवसांपुर्वी मुख्यमंत्री एकनाथ शिंदे (Eknath Shinde) यांचा ताफा चांदणी चौकातील वाहतूक कोंडीमध्ये अडकला होता.

यावेळी या रोजच्या वाहतूक कोंडीमुळे त्रस्त असणाऱ्या नागरिकांकडून मुख्यमंत्र्यांना या वाहतूक कोंडीवर तोडगा काढण्यासाठी एक निवदेन देण्यात आलं होतं. त्यानंतर मुख्यमंत्री शिंदेंकडून चांदणी चौक परिसराची पाहणी करण्यात आली हा पूल तोडण्याचा निर्णय घेतला होता. याच पार्श्वभूमीवर आता चांदणी चोकातील पूल देखील ब्लास्ट करुन पाडण्यात येणार आहे.

Edited By - Jagdish Patil