काँग्रेस चे प्रशांत जगताप यांच्यावर त्यांच्या आधीच्या पक्षातील पदाधिकारी फारूक इनामदार यांनी गंभीर आरोप केले आहेत. प्रशांत जगताप यांचे गुंड टिपू पठाण याच्यासोबत घनिष्ट संबंध असल्याचा आरोप इनामदार ने केला आहे. एका ५६ वर्षीय व्यक्तीने आत्महत्या केल्याप्रकरणी फारुख इनामदार याच्यावर पुण्यात गुन्हा दाखल करण्यात आला होता. न्यायालयाने त्याला अंतरिम जामीन दिला असून त्याने आता थेट प्रशांत जगताप यांच्यावर आरोप केले आहेत.

पुण्यातील प्रभाग ४१ मधील राष्ट्रवादी काँग्रेस चे उमेदवार फारुख इनामदार यांच्याविरुद्ध लष्कर पोलिस ठाण्यात गुन्हा दाखल करण्यात आला होता. फारुख इनामदार यांनी पुण्यातील कॅम्प परिसरातील राहणाऱ्या सादिक कपूर याला आत्महत्येस प्रवृत्त केल्याप्रकरणी हा गुन्हा दाखल करण्यात आला होता. खंडणी आणि जागेच्या व्यवहारातून सादिक यांनी टोकाचं पाऊल उचललं होतं अशी माहिती पोलिसांनी दिली होती. दरम्यान, सादिक ने त्याच्या कार्यालयात आत्महत्या करण्यापूर्वी एका सुसाईड नोट मध्ये तसेच हातावर फारुख इनामदार चे नाव लिहिले होते. पुणे पोलिसांनी मृत व्यक्तीच्या मुलाने दिलेल्या फिर्यादीनुसार, इनामदार सह चार जणांविरुद्ध गुन्हा दाखल केला होता. सादिक कपूर हा मोक्यातील आरोपी होता त्याच्यावर दोन गुन्हे दाखल करण्यात आले होते.

सादिक कपूर याने आत्महत्या करण्यापूर्वी काँग्रेसचे नेते प्रशांत जगताप यांना कुरिअरद्वारे एक पत्र पाठवले होते. या पत्रामध्ये फारुक इनामदार हा टिपू पठाण टोळीचा आका आहे; तसेच राजकीय लोकांच्या नावाखाली आमच्या भागात गोरगरिबांच्या जमिनी लाटण्याचे काम करीत असल्याचा आरोप त्याने या पत्रात केला होता.

इनामदार याला न्यायालयाने अंतरिम जामीन दिल्यानंतर त्याने आता थेट प्रशांत जगताप यांच्यावर आरोप केले आहेत. "सादिक कपूर आत्महत्या प्रकरणी माझा काही संबंध नाही. मी कधी ही त्याचशी फोन वर बोललो नाही. माझ्यावर जे आरोप झाले ते चुकीचे असून प्रशांत जगताप यांचे गुंड टिपू पठाण याच्याशी घनिष्ट संबंध आहेत. टिपू पठाण ने प्रशांत जगताप यांचा विधानसभा निवडणुकीच्या वेळी प्रचार केला होता. माझ्यावर आरोप करण्याचं कारण म्हणजे विधानसभेला मी प्रशांत जगताप यांचं काम केलं नव्हतं आणि याचा राग मनात ठेऊन त्यांनी माझ्यावर आरोप केले आहेत," अशी प्रतिक्रिया जामिनावर असलेले राष्ट्रवादी काँग्रेस चे उमेदवार फारुख इनामदार कडून करण्यात आला आहे.