सचिन जाधव, साम टीव्ही, प्रतिनिधी

Pune News : पुणे पोलिसांनी बनावट जामीनदारांचे रॅकेट उध्वस्त केले आहे. पोलिसांनी आतापर्यंत या प्रकरणात ११ आरोपींना अटक केली आहे. गुन्हेगारांना जामीन मिळवून देण्यासाठी वकिलांच्या मदतीने बनावट जामीनदार तयार केले जात होते. हे संपूर्ण प्रकरण उघडकीस आणण्यासाठी पोलिसांनी लष्कर कोर्ट आवारात सापळा रचण्यात आला होता.

पोलिस उपायुक्त राजकुमार शिंदे यांनी या प्रकरणाची माहिती दिली. ते म्हणाले, 'पुणे जिल्ह्यातील वेगवेगळ्या न्यायालयातील गंभीर गुन्ह्यामध्ये अटक असणाऱ्या आणि कारागृहामध्ये असणाऱ्या आरोपींना बोगस जामीनदार हजर करुन त्यांची खोटी कागदपत्रे बनवून, काही वकिलांच्या मार्फत जामीन मिळवून देण्याचे रॅकेट वानवडी पोलिसांनी उघडकीस आणले आहे. यामध्ये आतापर्यंत ११ लोकांना अटक करण्यात आली आहे. यामध्ये मुंबई, ठाणे, पुणे ग्रामीण परिसरातून बोगस जामीनदार तयार करण्यात आले होते.'

'त्याचबरोबर बनावट रेशन कार्ड, आधार कार्ड, सातबारा उतारे, पुरवठा अधिकाऱ्यांचे शिक्के तयार करणारी टोळी यांनाही अटक करण्यात आली आहे. बोगस जामीनदारांना न्यायालयासमोर हजर करणाऱ्या दोन वकिलांना अटक केली असून पुढील तपास सुरु आहे. या बनावट जामीनदारांना जाण्या-येण्याचा प्रवास खर्च, जेवण यासह दीड-दोन हजार रुपये मिळायचे. खोटी बनावट कागदपत्रे तयार करणाऱ्या टोळीला प्रत्येक जामीनामागे तीन ते चार हजार रुपये मिळायचे. उर्वरित रक्कम वकिलांना मिळायची', अशी माहिती शिंदे यांनी माध्यमांना दिली.

४ जानेवारी २०२५ रोजी लष्कर कोर्ट आवारात सापळा रचण्यात आला होता. तेव्हा हे संपूर्ण प्रकरण उघडकीस आले. आरोपींकडून ९५ संशयित रेशनकार्ड, ११ संशयित आधारकार्ड यांच्यासह इतर बनावट कागदपत्रे, मोबाईल हँडसेट आणि डिओ मोपेड असा एकूण ८९,०२० रुपयांचा मुद्देमाल जप्त करण्यात आला आहे.