गोपाळ मोटघरे, पिंपरी-चिंचवड

वादग्रस्त आयएएस अधिकारी पूजा खेडकर प्रकरणात (Pooja Khedkar Case) मोठी अपडेट समोर आली आहे. पूजा खेडकरच्या कुटुंबियांनी कंपनीचा थकित कर अखेर ऊभरला. त्यामुळे खेडकर यांच्या नावावर पिंपरी-चिंचवड (Pimpari-Chinchwad) येथे असणाऱ्या कंपनीचा लिलाव टळला आहे. पूजा खेडकरची आई मनोरमा खेडकर यांच्या नावावर असलेली कंपनी पिंपरी-चिंचवड महानगर पालिकेकडून जप्त होणार होती. या कंपनीने पालिकेचा कर बुडवला होता त्यामुळे ही कारवाई होणार होती. पण आता खेडकर कुटुंबीयांनी थकित कर भरल्यामुळे पालिकेकडून कारवाई होणार नाही.

पूजा खेडकरची आई मनोरमा खेडकर यांच्या नावावर पिंपरी चिंचवडमध्ये थर्मोव्हेरिटा इंजिनिअरिंग प्रायव्हेट लिमिटेड कंपनी आहे. या कंपनीने पिंपरी-चिंचवड महानगर पालिकेचा तब्बल २ लाख ८७ हजारांचा मालमत्ता कर भरला नव्हता. तसंच, १ लाख ७८ हजार रुपयांची पाणीपट्टी भरली नव्हती. पण आता खेडकर कुटुंबीयांनी हा थकीत कर आणि पाणीपट्टीचे पैसे भरले आहेत. कर संकलन विभागाचे प्रमुख निलेश देशमुख यांनी ही माहिती दिली. खेडकर कुटुंबीयांनी हा कर भरल्याने कोट्यवधी रुपये किंमतीच्या या कंपनीचा पुढील आठवड्यात होणारा लिलाव अखेर टळला आहे. त्यामुळे खेडकर कुटुंबीयांना दिलासा मिळाला आहे.

पिंपरी चिंचवड महापालिका हद्दीतील ज्योतिबानगर तळवडे येथे मनोरमा खेडकर यांची थर्मोव्हेरिटा इंजिनिअरिंग प्रायव्हेट लिमिटेड ही कंपनी आहे. या कंपनीने पिंपरी चिंचवड महापालिकेचे २ लाख ७७ हजार इतके कर मागील दोन वर्षांपासून बुडवले होते. महत्वाचे म्हणजे खेडकर कुटुंबीयांनी थर्मोव्हेरिटा इंजिनिअरिंग प्रायव्हेट लिमिटेड ही कंपनी रेड झोनमध्ये उभारली आहे. त्यामुळे खेडकर कुटुंबीयांची ही कंपनी अनधिकृत असल्याचा शिक्कामोर्तब पिंपरी चिंचवड महापालिकेने केला होता.

दरम्यान, वादग्रस्त आयएएस अधिकारी पूजा खेडकर यांना सोमवारी दिल्ली हायकोर्टाकडून मोठा दिलासा मिळाला. 'पूजा खेडकर यांना तात्काळ अटक करणे आवश्यक नाही.', असे हायकोर्टाने सुनावणी दरम्यान सांगितले होते त्यामुळे पूजा खेडकर यांची अटक दटळली होती. 'हे प्रकरण विचाराधीन असताना तिला अटक करू नये.', असे निर्देश दिल्ली हायकोर्टाने तपास यंत्रणेला दिले होते. २१ ऑगस्टला या प्रकरणाची सविस्तर सुनावणी होणार आहे.