दिलीप कांबळे, मावळ

पुणे जिल्ह्यातील मावळ तालुक्यात टाकवे बुद्रुक बाजारपेठेतील खंडोबा चौकात पुन्हा एकदा धोकादायक प्रकार घडला. एमएसईबीच्या जुन्या विद्युत तारांमधून ठिणग्या व जाळ निघताना दिसून आले. गेल्या महिन्यात याच ठिकाणी अशीच घटना घडली होती. परिणामी नागरिकांमध्ये भीतीचे वातावरण निर्माण झाले आहे.

फक्त खंडोबा चौकच नव्हे तर गावातील पाच ठिकाणी अचानक वीजतारा तुटल्या आहेत. यामुळे कधीही मोठा अपघात घडण्याची शक्यता नाकारता येत नाही. नागरिकांनी वारंवार महावितरण विभागाकडे तक्रारी करूनही या संदर्भात ठोस पावले उचलली जात नसल्याची खंत ग्रामस्थ व्यक्त करत आहेत.

गावात पन्नास वर्षांपूर्वी टाकण्यात आलेल्या जुन्या तारांचा वापर अद्याप सुरू आहे. परंतु गेल्या काही वर्षांत झालेल्या वाढत्या शहरीकरणामुळे व वीज वापरातील प्रचंड वाढीमुळे या जुन्या वायरवर अधिकचा ताण येत आहे. परिणामी अशा धोकादायक घटना घडत आहेत.

भर चौकात वाहतूक सुरू असताना अचानक वायर तुटल्यास नागरिक, व्यापारी आणि वाहनधारकांच्या जीवाला धोका निर्माण होऊ शकतो. त्यामुळे ग्रामस्थांनी महावितरण विभागाने तातडीने नवीन तारांची उभारणी करून हा प्रश्न सोडवावा, अशी मागणी केली आहे.