सागर आव्हाड, पुणे

पुण्यातील कुख्यात गुंड निलेश घायवळ (Nilesh Ghaywal) टोळीतील सदस्य अजय सरोदे (ajay sarvode) याला कोथरूड पोलिसांनी अटक केली असून, त्याच्याकडे असलेल्या परवानाधारक पिस्तुलातून त्याने दोनशे राऊंड फायर केल्याचे समोर आले आहेत. लोणावळा येथील फॉर्म हाऊस आणि सोनइ या गावातील शेतामध्ये त्याने सराव म्हणून हे राऊंड फायर केल्याचे समोर आले असून त्यादृष्टीने कोथरूड पोलीस तपास करीत आहेत. अजय सरोदे असे अटक केलेल्याचे नाव आहे.

तीन महिन्यांपूर्वी कोथरूडमध्ये घायवळ टोळीतील सदस्यांनी एका व्यक्तीवर गोळीबार केला होता. त्या घटनेनंतर काही मिनिटांतच टोळक्याने रस्त्यावर थांबलेल्या दुसऱ्या व्यक्तीवर प्राणघातक हल्ला केला. या मारहाण प्रकरणांत अजय सरोदे सहभागी होता, अशी माहिती तपासात समोर आली. या घटनांनंतर सरोदे फरार झाला होता.

कोथरूड पोलिसांनी काही दिवसांच्या पाठपुराव्यानंतर त्याला अटक केली. चौकशीदरम्यान सरोदे याच्याकडे परवानाधारक पिस्तुल असल्याचे उघड झाले. जानेवारी २०२४ मध्ये त्याला शस्त्राचा परवाना देण्यात आला होता. परवाना मिळाल्यानंतर त्याने तब्बल ४०० काडतुसे खरेदी केली, त्यापैकी २०० काडतुसे फायर केल्याचे समोर आले आहे.

सरोदेनं लोणावळ्यातील एका फॉर्म हाऊसवर आणि सोनई गावातील शेतामध्ये पिस्तुलातून गोळीबाराचा सराव केल्याची माहिती पोलिस तपासात मिळाली. परवानाधारक शस्त्र असूनही त्याचा अनधिकृत सराव आणि मोठ्या प्रमाणावर काडतुसांचा वापर यामुळे पोलिसांनी त्याच्याकडे विशेष चौकशी सुरू केली आहे. दरम्यान, पोलिसांकडून संबंधिताला शस्त्र परवाना देताना दिलेल्या दस्तऐवजांची व इतर कागदपत्रांची तपासणी केली जात आहे.