अक्षय बडवे, साम टीव्ही, प्रतिनिधी

Pune : पुण्यातून एक धक्कादायक बातमी समोर आली आहे. पुण्यात पोलीस कर्मचाऱ्यांना मारहाण झाल्याचे उघडकीस आले आहे. गाडी वेगाने का चालवतो असा प्रश्न विचारल्याने टोळक्याने पुणे पोलीस दलातील गुन्हे शाखेच्या कर्मचाऱ्यांना मारहाण केली. या प्रकरणी पुणे पोलिसांनी चौघांना अटक केली आहे. हा प्रकार पुणे-मुंबई महामार्गावर घडला आहे.

मिळालेल्या माहितीनुसार, काल (३१ जुलै) रात्री नऊच्या सुमारास पुणे-मुंबई महामार्गावर खडकी भागात गुन्हे शाखेचे दोन पोलीस कर्मचारी गस्त घालत होते. तेव्हा चार जणांच्या टोळक्याने या कर्मचाऱ्यांवर हल्ला केला. हल्ला करुन चौघे पळून गेले. पुणे दलातील कर्मचाऱ्यांना मारहाण झाल्याची घटना समोर आल्याने परिसरात खळबळ उडाली आहे.

एक दुचाकीस्वार त्याची दुचाकी वेगाने आणि वेडीवाकडी चालवत असल्याचे पोलिसांनी दिसले. त्याबाबत त्यांनी दुचाकीस्वाराची विचारणा केली. दुचाकीवरील तरुणांनी पोलिसांशी वाद घालायला सुरुवात केली. नंतर दुसऱ्या दुचाकीवरुन आलेल्या त्यांच्या मित्र देखील पोलिसांशी वाद घालू लागले. रागाच्या भरात चौघांनी पोलिसांवर अचानक हल्ला केला.

गस्तीवर असलेल्या दोन पोलीस कर्मचाऱ्यांना पुण्यातील खडकी भागात मारहाण झाली. मारहाण करणाऱ्या तरुणांच्या विरोधात खडकी पोलीस ठाण्यात गुन्हा दाखल करण्यात आला आहे. जुनेद इक्बाल शेख (वय २७ वर्षे), नफीज नौशाद शेख (वय २५ वर्षे), युनूस युसुफ शेख (वय २५ वर्षे), आरिफ अक्रम शेख (वय २५ वर्षे) अशी अटक केलेल्यांची नावे आहेत.