गणरायाच्या आगमनाची सर्वजण आतुरतेने वाट पाहत आहेत. गणपतीच्या आगमनासाठी आता अवघे काही तास शिल्लक राहिले आहेत. पुणे पोलिस देखील गणेशोत्सवासाठी सज्ज झाले आहेत. आज पुणे पोलिस आयुक्त अमितेश कुमार यांनी पत्रकार परिषद घेत गणेशोत्सव तयारीची माहिती दिली. गणेशोत्सवादरम्यान पुण्यातील सर्वच ठिकाणी पोलिसांचा कडक बंदोबस्त तैनात करण्यात आला आहे. यंदाच्या गणेशोत्सवामध्ये एआय कॅमेऱ्यांच्या नजरा असणार आहेत.

गणेशोत्सवाच्या पार्श्वभूमीवर पुण्यात ७००० पोलिस तैनात असणार आहेत. पोलिस आयुक्त, पोलिस सह आयुक्त, अपर पोलिस आयुक्त, १० पोलिस उपयुक्त, २७ सहायक पोलिस आयुक्त, १५४ पोलिस निरीक्षक, ६१८ सहनपोलीस निरीक्षक, ६२८६ अंमलदार, १६ स्ट्रायकर, १४ क्यू आर टी हिट, ७ बी डी डी ए स पथके, ११०० होमगार्ड, १ एस आर पी एफ कंपनी गणेशोत्सव काळात सज्ज राहणार आहे.

पुणे शहरात एकूण ३९५९ सार्वजनिक गणेश मंडळे आहेत. गणेशोत्सवाच्या पार्श्वभूमीवर पुणे पोलिसांनी एकूण ८२ बैठक घेतल्या आहेत. प्रत्येक महत्वाच्या चौकात एआय कॅमेऱ्याचे लक्ष ठेवले जाणार आहे. चेंगराचेंगरी परिस्थिती उद्भवू नये म्हणून विशेष गर्दीवर नियोजन करण्यात आले आहे. ३० ऑगस्ट ते ४ सप्टेंबर आणि ६ सप्टेंबर असे ७ दिवस सकाळी ६ ते रात्री १२ वाजेपर्यंत ध्वनिक्षेपक यांना परवानगी देण्यात आली आहे.

पुणे शहरात २७ ऑगस्ट आणि ६ सप्टेंबर रोजी ड्राय डे घोषित करण्यात आला आहे. गणेशत्सवाच्या पार्श्वभूमीवर भाविकांवर लक्ष ठेऊन त्यांचे दागिने चोरणाऱ्या चोरट्यांवर अँटी चेन स्नाचिंग पथकाचे लक्ष असणार आहे. नुकताच पुण्यातील मानाच्या ५ गणपतींच्या प्राणप्रतिष्ठापनेच्या वेळा देखील समोर आल्या आहेत. महत्वाचे म्हणजे पुण्यातील गणेशोत्सव काळामध्ये राज्यासह देशभरातील गणेशभक्त दर्शनासाठी आणि देखावा पाहण्यासाठी येत असतात. त्यामुळे पुण्यात गणेशोत्सव काळात मोठी गर्दी होते. हेच लक्षात घेऊन दरवर्षी पोलिस दलाकडून योग्य नियोजन करून कडक बंदोबस्त तैनात केला जातो.