सागर आव्हाड, साम टीव्ही, प्रतिनिधी

पुण्याच्या दौंडमधील चौफुला येथील एका कलाकेंद्रामध्ये गोळीबार झाला. या घटनेबाबतची माहिती राष्ट्रवादी शरद पवार गटाचे आमदार रोहित पवार यांनी एक्स पोस्टमार्फत दिली. या गोळीबार प्रकरणातील नवी माहिती समोर आली आहे. अपर पोलीस अधीधक गणेश विरादार यांनी पत्रकार परिषदेमध्ये दौंड गोळीबार प्रकरणात अपडेट दिली आहे.

पुणे ग्रामीणचे अपर पोलीस अधीक्षक गणेश बिरादार यांनी दिलेल्या माहितीनुसार, गोळीबार प्रकरणी चार जणांच्या विरोधात यवत पोलीस स्टेशनमध्ये गुन्हा दाखल करण्यात आला आहे. कला केंद्र व्यवस्थापकाच्या तक्रारीवरून बाळासाहेब मांडेकर, गणपत जगताप, चंद्रकांत मारणे आणि अन्य एकाच्या विरोधात गुन्हा दाखल झाला आहे. सध्या यवत पोलीस स्टेशनमध्ये गुन्हा दाखल करण्याचे काम सुरु आहे.

दौंडच्या वाखारी येथील न्यू अंबिका कला केंद्रामध्ये गोळीबार झाला. सोमवारी (२१ जुलै) रात्री साडेदहा ते अकरा या सुमारास गोळीबार झाला होता. कलाकेंद्रात डान्स सुरु असताना गोळीबार झाला, पण त्यात कोणीही जखमी झाले नाही. या प्रकरणाची चौकशी करण्यासाठी पोलिसांनी सहा महिलांना चौकशीसाठी ताब्यात घेतले आहे, असे अपर पोलीस अधीक्षक गणेश बिरादार यांनी म्हटले आहे.

आमदार रोहित पवार यांनी एक्स पोस्ट शेअर करत दौंडमधील गोळीबार घटना अधोरेखित केली होती. या गोळीबार प्रकरणात सत्ताधारी पक्षातील आमदाराचा भाऊ असल्याचा दावा रोहित पवार यांनी केला होता. आमदाराच्या भावाने केलेल्या गोळीबारात एक तरुणी जखमी झाल्याचेही रोहित पवार यांनी त्यांच्या एक्स पोस्टमध्ये म्हटले होते.