अक्षय बडवे, पुणे

उघड्यावर लघुशंका करताना हटकल्याने टोळक्याने संतप्त होत वॉचमनसह त्याच्या पत्नीला बेदम मारहाण करून हवेत गोळीबार केला. पुण्यातल्या थेऊरमध्ये ही धक्कादायक घटना घडली. या घटनेमध्ये गंभीर जखमी झालेल्या महिलेचा उपचारादरम्यान मृत्यू झाला. शीतल चव्हाण (२९ वर्षे) असं मृत्यू झालेल्या महिलेचे नाव आहे. याप्रकरणी लोणी काळभोर पोलिसांनी तिघांना अटक केली असून तपास सुरू आहे.

मिळालेल्या माहितीनुसार, पुणे-सोलापूर महामार्गावरील थेऊर भागात एका जमिनीचे प्लॉटिंग सुरू आहे. याठिकाणी अक्षय चव्हाण पत्नीसोबत रखवालदारीसाठी कार्यरत होते. शुक्रवारी रात्री एका कारमधून ३ जण उतरले आणि त्यांनी तिथे मोकळी जागा असल्यामुळे लघुशंका केली. त्यावेळी अक्षयने त्यांना हटकले. यातून त्या तिघांची आणि अक्षयमध्ये बाचाबाची झाली.

अक्षय आणि त्या तरुणांमध्ये कडाक्याचे भांडण झाले. या भांडणानंतर अजय मुंढेने त्याच्याजवळील पिस्तुलने हवेत गोळीबार केला आणि दगडफेक केली. या दगडफेकीत दगड लागल्याने अक्षयची पत्नी गंभीर जखमी झाली. जखमी झालेल्या अक्षयच्या पत्नीला तात्काळ रुग्णालयात दाखल केले. उपचारादरम्यान त्यांचा मृत्यू झाला.

या घटनेमुळे थेऊर परिसरामध्ये खळबळ उडाली होती. या घटनेनंतर आरोपींनी घटनास्थळावरून पळ काढला होता. याप्रकरणी लोणी काळभोर पोलिसांनी तिघांविरोधात गुन्हा दाखल केला. सतीश लोखंडे, अजय मुंढे आणि भानुदास शेलार या तिघांना पोलिसांनी अटक केली. आरोपींकडून पोलिसांनी पिस्तुल, काडतुसे आणि कार जप्त केली.