Summary -

• जुन्नरमध्ये विद्यार्थिनीवर कोयत्याने जीवघेणा हल्ला

• लग्नाला नकार दिल्याच्या रागातून तरुणाने केला हल्ला

• महेश डामसे नावाचा आरोपी घटनास्थळावरून फरार

• गंभीर जखमी विद्यार्थिनीवर खासगी रुग्णालयात उपचार सुरू

रोहिदास गाडगे, पुणे

लग्नाला नकार दिल्यामुळे विद्यार्थिनीवर कोयत्याने सपासप वार करण्यात आल्याची घटना समोर आली आहे. पुणे जिल्ह्यातल्या जुन्नरमध्ये ही धक्कादायक घटना घडली. जुन्नर शहरातील आदिवासी मुलींच्या शासकीय वसतिगृहाजवळ विद्यार्थिनीवर जीवघेणा हल्ला करण्यात आला. विद्यार्थिनी कॉलेजला जात असताना तिच्यावर कोयत्याने वार करण्यात आले. या हल्ल्यात विद्यार्थिनी गंभीर जखमी झाली आहे. सध्या पोलिस या प्रकरणाचा तपास करत आहेत.

मिळालेल्या माहितीनुसार, जुन्नर शहरातील आदिवासी मुलींच्या वसतिगृहातून कॉलेजला पायी जात असलेल्या विद्यार्थिनीवर जीवघेणा हल्ला करण्यात आला. जुन्नर ग्रामीण रुग्णालयाच्या मागील बाजूस असलेल्या पत्राशेडजवळ ही घटना घडली. विद्यार्थिनीवर कोयत्याने सपासप वार करण्यात आले. या हल्ल्यात विद्यार्थिनी गंभीर जखमी झाली असून तिच्यावर जुन्नर येथील खासगी रुग्णालयात उपचार सुरू आहेत. या घटनेमुळे परिसरात एकच खळबळ उडाली.

लग्नाला नकार दिल्याच्या रागातून विद्यार्थिनीवर जीवघेणा हल्ला करण्यात आला. महेश डामसे असे आरोपी तरुणाचे नाव आहे. विद्यार्थिनीवर कोयत्याने हल्ला करून आरोपी घटनास्थळावरून पळून गेला. या प्रकरणी जुन्नर पोलिस ठाण्यात महेशविरोधात गुन्हा दाखल करत पोलिस त्याचा शोध घेत आहेत. या घटनेनंतर निवासी वसतिगृहात राहणाऱ्या विद्यार्थिनींच्या सुरक्षेचा प्रश्न पुन्हा ऐरणीवर आला आहे.

दरम्यान, मुंबईतील गोरेगावमध्ये तरुणाने आपल्या सावत्र आईवर जीवघेणा हल्ला केला. वडिलांनी दुसरं लग्न केल्याने संतप्त झालेल्या तरुणाने सावत्र आईच्या डोक्यात जिमसाठी वापरण्यात येणारी लोखंडी प्लेट घातली. या हल्ल्यात महिला गंभीर जखमी झाली. तिच्यावर सध्या रुग्णालयात उपचार सुरू आहेत. ही घटना गोरेगावमध्ये घडली. या प्रकरणी बांगूरनगर पोलिसांनी आरोपीविरोधात गुन्हा दाखल करत त्याला अटक केली. अब्दुल रेहमान साबीर अन्सारी असं आरोपी तरुणाचे नाव आहे.