Pune Crime News:

पुणे शहरात हत्याराचा धाक दाखवून दुचाकीस्वारास लुबाडल्याची घटना जुलै महिन्यात घडली होती. या प्रकरणात सराईत गुन्हेगार नीलेश बनसुडे आणि त्याच्या दोन साथीदारांवर महाराष्ट्र संघटित गुन्हेगारी नियंत्रण (मोका) कायद्यांतर्गत कारवाई करण्यात आली आहे.

याबाबत अधिक माहिती अशी की, १० जुलै रोजी पुण्यात (Pune) शस्त्राचा धाक दाखवून दुचाकीस्वाराला लुटल्याची घटना घडली होती. फिर्यादी आपल्या मित्रासह १० जुलै रोजी दुचाकीवरून दिवेघाटातून येत असताना मोटारीतून आलेल्या आरोपींनी त्यांना अडविले. त्यांना पिस्तुलासारख्या हत्याराचा धाक दाखवून दीड हजार रुपये काढून घेतले.

या प्रकरणी लोणी काळभोर पोलीस ठाण्यात गुन्हा दाखल करण्यात आला आहे. आरोपी बनसुडे याने संघटित गुन्हेगारी टोळी तयार करुन खून, खुनाचा प्रयत्न, जबरी चोरी, बेकायदेशीर हत्यार बाळगणे असे गंभीर स्वरुपाचे गुन्हे केले आहेत.

नीलेश मल्हारी बनसुडे (वय २६, रा. बनसुडे मळा, इंदापूर), ओम सोमदत्त तारगांवकर (वय २१, रा. महतीनगर, इंदापूर), रोहित मच्छिंद्र जामदार (वय २३, रा. कसबा पेठ, इंदापूर) अशी अटक केलेल्यांची नावे आहेत. पोलिस आयुक्त रितेश कुमार यांनी आतापर्यंत ६९ संघटीत गुन्हेगारी टोळ्यांविरुध्द मोका कायद्यान्वये कारवाई केली आहे. (Latest Marathi News)