Pune : पुण्यातून धक्कादायक घटना उघडकीस आली आहे. जेवणाच्या बहाण्याने घरी बोलावून, त्याला दारू पाजून नशेचा फायदा उचलत एका व्यक्तीची हत्या करण्यात आली आहे. आरोपींनी किरकोळ वादातून मृतकाची दगडाने ठेचून हत्या केली. त्यानंतर त्याचा मृतदेह भीमा नदीमध्ये फेकल्याची माहिती समोर आली आहे.

मिळालेल्या माहितीनुसार, शानू रफिक शेख ही व्यक्ती विलेपार्ले, मुंबईहून कामाच्या निमित्ताने ताथवडे येथील एका कंपनीमध्ये आली होती. घरी न पोहोचल्याने, मोबाईलफोन बंद आढळल्यामुळे कंपनीतील व्यवस्थापकांनी वाकड पोलीस ठाण्यात शानू यांची बेपत्ता असल्याची नोंद केली. हे प्रकरण पुढे गुन्हे शाखा युनिट चारकडे सोपवण्यात आले.

गुन्हे शाखेतील पोलीस अधिकारी शानू यांचा शोध घेत असताना पेरणे फाटा, भीमा नदीपात्रामध्ये एक मृतदेह आढळून आली. तपासानंतर हा मृतदेह शानू शेखचा असल्याची स्पष्ट झाले. त्यानंतर पोलीस स्टेशनमध्ये खुनाचा गुन्हा दाखल करण्यात आला. तपासानंतर पोलिसांनी संशयित शरद घरद याला ताब्यात घेत त्याची चौकशी सुरु केली.

पोलिसांनी दिलेल्या माहितीनुसार, मृतक शानू शेखला जेवणाच्या बहाण्याने शरद घरद याने काळेवाडी येथे बोलावून घेतले होते. त्यानंतर त्यांनी दारू देखील प्यायली. दारूच्या नशेत दोघांमध्ये किरकोळ वाद झाला. या वादातून शरदने शानूची दगडाने ठेचून हत्या केली. त्यानंतर त्याचा मृतदेह भीमा नदीत फेकून दिला. या प्रकरणी पोलिसांनी शरद घरद आणि गिरीधर रेडे या दोघांच्या विरोधात गुन्हा दाखल केला आहे.