• पुण्यात नवविवाहित आयटी इंजिनिअर तरुणीची आत्महत्या

• हुंड्यासाठी विवाहितेचा मानसिक छळ

• कारसाठी ५ लाख रुपये माहेरून आणण्यसाठी छळ

• सासरच्यांकडून छळ केल्याने तिने आत्महत्या केल्याचा कुटुंबीयांचा आरोप

सचिन जाधव, पुणे

पुण्यातील वैष्णवी हगवनणे प्रकरणासारखी आणखी एक धक्कादायक घटना घडली. सासरच्यांकडून होणाऱ्या छळाला कंटाळून वैष्णवी गिरसे या विवाहितेने आत्महत्या केली. राहत्या घरी तिने गळफास घेत आयुष्य संपवलं. कार घेण्यासाठी माहेरच्यांकडून ५ लाख रुपये आणावेत, अशी मागणी करत वैष्णवीचा छळ केला जात होता. अवघ्या चार महिन्यापूर्वी लग्न झालेल्या आयटी इंजिनियर वैष्णवीने राहत्या घरी आयुष्य संपवलं. गुरुवारी रात्री ही घटना घडली.

वैष्णवी ओंकार गिसरे (वय २३ वर्षे) असा आत्महत्या केलेल्या विवाहितेचे नाव होते. ती पुण्यातील वडाचीवाडी येथे कुटुंबीयांसोबत राहत होती. वैष्णवीने आत्महत्या केल्यानंतर तिचे वडील प्रवीण रघुनाथ जरांडे यांनी काळेपडळ पोलिस ठाण्यात तक्रार दाखल केली. या तक्रारीनंतर तिचा नवरा, सासू आणि सासऱ्यांविरोधात गुन्हा दाखल करण्यात आला.

काळेपडळ पोलिसांनी प्रवीण जरांडे यांच्या फिर्यादीनुसार वैष्णवीचा नवरा ओंकार संजय गिसरे (वय २८ वर्षे), सासरे संजय महादेव गिसरे (वय ४९ वर्षे) आणि सासू रुपाली संजय गिसरे (वय ४२ वर्षे) यांच्याविरोधात हुंडा प्रतिबंधक कायदा आणि आत्महत्येस प्रवृत्त केल्याप्रकरणी गुन्हा दाखल केला. पोलिस या प्रकरणाचा तपास करत आहेत.

वैष्णवीचे लग्न ९ मे २०२६ रोजी ओंकार गिसरे याच्याशी झाले होते. विवाहावेळी माहेरच्यांनी सुमारे ४५ लाख रुपये खर्च करून १० तोळे सोने दिले होते. त्यानंतरही कार खरेदीसाठी पाच लाख रुपयांची मागणी तिच्या सासरच्यांकडून केली जात होती. त्यासाठी वैष्णवीचा मानसिक छळ केला जात असल्याचा आरोप तिच्या माहेरच्यांनी केला आहे. याच कारणामुळे वैष्णवीने आत्महत्या केली.